មន្រ្តីជាន់ខ្ពស់ក្រសួងពាណិជ្ជកម្ម ចូលរួមបើកសិក្ខាសាលា ដើម្បីជំរុញវិស័យនាំចេញវាយនភ័ណ្ឌ របស់ប្រទេសកម្ពុជា ឡាវ មីយ៉ាន់ម៉ា និងវៀតណាម (CLMV) ទៅកាន់ទីផ្សារជប៉ុន

(រាជ​ធានី​ភ្នំពេញ)៖ នា​ថ្ងៃទី១៣ខែកុម្ភៈ​​​ ឆ្នាំ២០២០ នៅសណ្ឋាគារ​សុខាភ្នំពេញ តំណាងរបស់ ឯកឧត្តមប៉ាន  សូរស័ក្តិ  រដ្ឋមន្ត្រីក្រសួងពាណិជ្ជកម្ម  ឯកឧត្តម​ ប៊ុន ចន្ធី  អនុ​រដ្ឋ​លេខាធិការក្រសួង​ពាណិជ្ជកម្ម​ អញ្ជើញ​ចូល​រួមបើក​សិក្ខាសាលា​ស្តីពី​​“ការនាំចេញផលិតផលសក្តានុពលលើវិស័យវាយនភ័ណ្ឌ និងសម្លៀកបំពាក់ពីកម្ពុជា ឡាវ មីយ៉ាន់ម៉ានិងវៀតណាម ទៅកាន់ទីផ្សារជប៉ុន និងខ្សែសង្វាក់សាកលនៃឧស្សាហកម្មវាយនភ័ណ្ឌ​ (ExportPotential from Cambodia, Lao PDR, Myanmar and Viet Nam (CLMV) to Japan andGlobal Value Chain in the Textile and Clothing Industry)” ដោយសិក្ខាសាលានេះ​​សហ​​ការ​រៀបចំឡើង​រវាង​​ក្រសួង​ពាណិជ្ជកម្ម​និង​មជ្ឈមណ្ឌល​អាស៊ាន​-ជប៉ុន​ ក្នុង​​គោល​បំណង​​ផ្តល់​នូវចំណេះ​ដឹង​​និងស្វែងយល់ពីអត្ថប្រយោជន៍នៃខ្សែសង្វាក់ជាសាកលនៃឧស្សាហកម្មវាយនភ័ណ្ឌ និងការប្រកួតប្រជែងផលិត​ផ​ល​នាំចេញរបស់ប្រទេសCLMV ទៅ​​កាន់ទីផ្សារជប៉ុនក៏ដូចជាស្វែងយល់ពីនិន្នា​ការទីផ្សារនាពេលបច្ចុប្បន្ននៃ​​វិស័យវាយនភ័ណ្ឌ​នៅជប៉ុន ដោយសិក្ខាសាលានេះ​មាន​ការ​ចូល​រួម​ពី​វាគ្មិន​ជាតិ​ និង​អន្តរជាតិ​ចែក​ជូ​ន​នូវ​បទ​បង្ហាញ​ដ៏មាន​សារៈ​សំខាន់​ដល់​សិក្ខាកាម​សរុប​ជាង​ ៩០​នាក់​ អញ្ជើញ​ចូល​រួម​ក្នុង​សិក្ខាសាលានា​នេះ​។  

​ឆ្លៀត​ក្នុង​ឱកាស​នេះ ឯក​ឧត្តមអនុ​​រដ្ឋ​លេខា​ធិកា​រ​ បាន​ឡើង​ថ្លែង​សុន្ទរកថា​បើក​សិក្ខាសាលា​​ ​ដោយ​មាន​សេចក្តី​រីក​រាយ​ និង​ស្វាគមន៍យ៉ាងកក់ក្តៅបំផុត ចំពោះវត្តមាន​ចូល​រួម​របស់​ លោក BANDO Shunsuke លោក​សាស្រ្តាចារ្យ​​វាគ្មិន​ពី​ប្រទេស​CLMVសមាជិក​នៃមជ្ឈមណ្ឌល​អាស៊ាន-ជប៉ុន​ ​ព្រមទាំងសិក្ខាកាមទាំង​អស់​​ ដែល​មាន​វត្តមាន​ក្នុង​សិក្ខាសាលានេះ​ដោយ​ ឯក​ឧត្តម បាន​ជម្រាប​ជូន​ពី​មិត្ត​ភាព​រវាង​ប្រទេស​កម្ពុជា​​ ជាមួយ​នឹង​ប្រទេស​ឡាវ មីយ៉ាន់ម៉ានិងវៀតណាម ក៏​ដូច​ជា​ប្រទេស​ជប៉ុន មានមិត្ត​ភាព​ជា​យូ​រឆ្នាំ​កន្លង​មក​ ព្រម​ទាំង​មាន​នូវ​ចម្រៀង​ និង​មាន​ការ​ផ្លាស់​ប្តូរ​​ខ្សែ​សង្វាក់​ផលិតកម្ម​រវាង​ប្រទេស CLMV ផង​ដែរ​។  

​ឯក​ឧត្តមអនុ​​រដ្ឋ​លេខា​ធិកា​រ​ បាន​លើក​ឡើង​ពី​ទំហំពាណិជ្ជកម្មទ្វេភាគីជាមួយ​ជប៉ុន នៅឆ្នាំ២០១៨មានទំហំទឹកប្រាក់ប្រមាណជាង ១,៥៨៨ លានដុល្លារ ក្នុងនោះកម្ពុជាបាននាំចេញទៅជប៉ុននូវទំនិញសក្តានុពលមួយចំនួន ដូចជា សម្លៀកបំពាក់ ស្បែកជើងខ្សែអ៊ីសូឡង់ និងបរិក្ខាអគ្គីសនី។ល។ ឯក​ឧត្តម ក៏​បាន​ជម្រាប​ជូន​​ពីគម្រោងវិនិយោគរបស់ជប៉ុនចំនួន១៣៧គម្រោង ក្នុងទុន វិនិយោគសរុបចំនួនប្រមាណ ២,៥ ពាន់លានដុល្លារ ផ្តោតសំខាន់លើផលិតផលគ្រឿងបង្គុំអគ្គីសនីនិងអេឡិចត្រូនិក គ្រឿងបង្គុំរថយន្ត និងបរិក្ខារបច្ចេកទេសកសិ-ឧស្សាហកម្មការកែច្នៃម្ហូបអាហារ សណ្ឋាគារ ទេសចរណ៍ មន្ទីរពេទ្យ និងផ្សារទំនើប។ ​ឯក​ឧត្តម ក៏​បាន​បន្ថែម​ទៀត​ថា​ការ​​អភិវឌ្ឍ​នៃ​ប្រទេស​កម្ពុជា​ ដែល​​រាជរដ្ឋាភិបាលកម្ពុជាបានដាក់ចេញជាបន្តនូវការអនុវត្តយុទ្ធសាស្រ្ត​ចតុកោណដំណាក់កាលទី៤ដើម្បីពង្រឹង និងជំរុញកំណើនសេដ្ឋកិច្ចរវាងប្រទេសទាំងពីរឱ្យមានប្រៀបលើការប្រកួតប្រជែងក្នុងរបត់ទីផ្សារពិភពលោកដែលកំពុងធ្វើបដិវត្តន៍ឌីជីថល ៤.០។​

ជា​កិច្ច​បន្ទាប់​ លោក BANDO Shunsuke ប្រធានផ្នែកស្រាវជ្រាវ និងវិភាគគោលនយោបាយនៃមជ្ឈមណ្ឌលអាស៊ាន-ជប៉ុន​ ឡើង​ថ្លែង​សុន្ទរកថា ដោយ​មាន​ការ​យក​ចិត្ត​ទុក​ដាក់​និង​សហការ​រៀប​ចំ​សិក្ខាសាលា​ពី​ថ្នាក់​ដឹក​នាំ​ក្រសួង​ពាណិជ្ជកម្ម​ ក្នុង​ការ​​​បង្កើត​សិក្ខា​​សាលា​នា​​​ព្រឹក​នេះ​ឡើងដោយ​រលូន​​។​ លោក​បាន​បន្ត​លើក​ឡើង​ថាប្រទេស​កម្ពុជា​មាន​ទីតាំងភូមិសាស្រ្ត​ស្ថិត​​នៅ​កណ្តាល​នៃ​តំបន់​អាស៊ាន​​ដោយ​មាន​អំណោយ​ផល​ដល់​ការវិនិយោគ​ ព្រម​ទាំង​មាន​ការ​រីក​ចម្រើន​ទាំង​ហេដ្ឋារចនា​សម្ព័ន្ធ​ទន់​និង​រឹង​ ក្នុ​ងការ​​ជំរុញ​ឲ្យ​មាន​ការអភិវឌ្ឍ​សេដ្ឋ​កិច្ច​វិនិយោគ​ ពាណិជ្ជកម្ម​ និង​ទេសចរណ៍​ ជាដើម។​ លោក​ក៏​បាន​គូស​បញ្ជាក់​ថាសិក្ខាសាលានេះ​នឹង​ផ្តល់​ឱកាស​ដល់​សិក្ខាកាម​ បាន​យល់​ដឹង​អំពី​បញ្ហា​ប្រឈមនិង​ឱកាស​វិនិយោគ​​នៃឧស្សាហកម្ម​​វាយន​ភ័ណ្ឌ​នៅ​ CLMVទៅ​កាន់​ប្រទេស​ជប៉ុន​ឱ្យ​កាន់​តែ​ល្អប្រសើរ​ឡើង​ពី​មួយ​ឆ្នាំ​ទៅ​មួយ​ឆ្នាំ​ដើម្បី​បង្កើន​នូវ​ខ្សែ​សង្វាក់​ផលិត​កម្ម​នាំ​ចេញ​ទៅ​ប្រទេស​ជប៉ុន​ក្នុង​បរិយាកាស​ចែក​រំលែក​ព័ត៌មាន​ និងជំនួប​​ពិភាក្សា សម្រាប់​ស្វែងរក​នូវ​យុទ្ធសាស្រ្ត​ល្អៗ​ក្នុង​ចំណោម​ប្រទេស​CLMV។

 រូបភាព​ និងអត្ថបទ៖ នាយកដ្ឋានអភិវឌ្ឍន៍ទីផ្សារ