ក្រសួងពាណិជ្ជកម្ម

ឯកឧត្តមរដ្ឋមន្ត្រីក្រសួងពាណិជ្ជកម្ម ប្រគល់វិញ្ញាបនបត្រអនុញ្ញាតឱ្យប្រើប្រាស់ម៉ាកសមូហភាព “គុយទាវភ្នំពេញ” និងចូលរួមជាសាក្សីក្នុងពិធីចុះកិច្ចសន្យាផ្តល់សិទ្ធិប្រកបអាជីវកម្ម “អ៊ុយគុយទាវ”

ថ្ងៃទី២១ ខែកុម្ភៈ ឆ្នាំ២០២០ ម៉ោង ១១:២១ នាទី យប់

👁 0

(រាជធានីភ្នំពេញ)៖ដើម្បីលើកកម្ពស់ការប្រើប្រាស់ម៉ាកសមូហភាព “គុយទាវភ្នំពេញ” នៅថ្ងៃទី២១ ខែកុម្ភៈ ឆ្នាំ២០២០ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអញ្ជើញជាអធិបតីក្នុងពិធីប្រគល់វិញ្ញាបនបត្រអនុញ្ញាតឱ្យប្រើប្រាស់ម៉ាកសមូហភាព“គុយទាវភ្នំពេញ” និងជាសាក្សីក្នុងពិធីចុះកិច្ចសន្យាផ្តល់សិទ្ធិប្រកបអាជីវកម្ម “អ៊ុយគុយទាវ” នៅភោជនីយដ្ឋាន យ៉ី សាង ឌឺហ្គាឌិន ទួលគោក។

នាឱកាសនោះ ឯកឧត្តមរដ្ឋមន្ត្រី បានថ្លែងអំណរគុណយ៉ាងជ្រាលជ្រៅចំពោះប្រធានសហព័ន្ធទេសចរណ៍កម្ពុជា ប្រធានសមាគមសហគមន៍ចុងភៅកម្ពុជា និងសហការី ដែលបានយកអស់កំលាំងកាយចិត្តសហការគ្នាយ៉ាងជិតស្និទ្ធ ក្នុងការខិតខំផ្សព្វផ្សាយ និងប្រើប្រាស់ម៉ាកសមូហភាព“គុយទាវភ្នំពេញ”ចាប់តាំងពីបានសម្ពោធដាក់ឱ្យប្រើប្រាស់ជាផ្លូវការ កាលពីថ្ងៃទី១០ ខែតុលា ឆ្នាំ២០១៩ កន្លងមកនេះ។ជាក់ស្តែងពិធីប្រគល់វិញ្ញាបនបត្រអនុញ្ញាតឱ្យប្រើប្រាស់ម៉ាកសមូហភាព “គុយទាវភ្នំពេញ” ជូនដល់សមាជិកថ្មីៗទៀត នៃសមាគមសហគមន៍ចុងភៅកម្ពុជានាថ្ងៃនេះបានបង្ហាញពីវឌ្ឍនភាពនៃការប្រើប្រាស់ម៉ាកសមូហភាព “គុយទាវភ្នំពេញ” ដោយផ្សារភ្ជាប់ជាមួយប្រព័ន្ធគ្រប់គ្រង ត្រួតពិនិត្យគុណភាពនិងស្តង់ដារអនាម័យស្របតាមបទដ្ឋានបច្ចេកទេសត្រឹមត្រូវ ដើម្បីជួយទាក់ទាញភ្ញៀវទេសចរឱ្យស្គាល់រសជាតិមុខម្ហូបដែលមានប្រវត្តិជាយូរលុងមកហើយ និងដើម្បីបង្កើតការងារជូនប្រជាពលរដ្ឋកាត់បន្ថយភាពក្រីក្រ និងចូលរួមចំណែក កសាងសេដ្ឋកិច្ចជាតិឱ្យបានកាន់តែរីកចម្រើនបន្ថែមទៀត។នេះក៏ជាសក្ខីភាពបង្ហាញឱ្យឃើញកាន់តែច្បាស់ពីការរីកចម្រើនក្នុងការប្រកបអាជីវកម្មប្រកបដោយជោគជ័យក្នុងវិស័យសេវាកម្មផ្តល់ចំណីអាហារដែលជួយលើកតម្កើងកិត្យានុភាពម្ហូបជាតិឱ្យកាន់តែល្បីរន្ទឺបន្ថែមទៀត។

ឯកឧត្តមរដ្ឋមន្ត្រី ក៏បានគូសបញ្ជាក់ និងកោតសរសើរទៀតថា នាពេលថ្មីៗនេះយើងសង្កេតឃើញថា មានភោជនីយដ្ឋានថ្មីៗ ជាច្រើនបានបង្កើតឡើងក្នុងរាជធានីភ្នំពេញនិងតាមបណ្តាខេត្តក្រុងសំខាន់ៗមួយចំនួនក្នុងព្រះរាជាណាចក្រកម្ពុជា ក្រោមទម្រង់ជាការផ្តល់សិទិ្ធប្រកបអាជីវកម្ម(Franchise) នៅក្នុងប្រទេស ពីក្រៅប្រទេសមកក្នុងប្រទេសនិងពីក្នុងប្រទេសទៅក្រៅប្រទេស ដែលសកម្មភាពអាជីវកម្មទាំងនេះជាការនាំចេញនៅនឹងកន្លែងស្របតាមអនុសាសន៍ដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា។ជាក់ស្តែងការចុះកិច្ចសន្យាប្រគល់សិទិ្ធប្រកបអាជីវកម្ម “អ៊ុយគុយទាវ” នាថ្ងៃនេះ បានបង្ហាញឱ្យឃើញថា គ្រឹះស្ថានប្រកបអាជីវកម្មណាដែលបានប្រើប្រាស់ឧបករណ៍កម្មសិទិ្ធបញ្ញានិងបង្កើតម៉ូដែលអាជីវកម្មផ្ទាល់ខ្លួនប្រកបដោយជោគជ័យ ម្ចាស់អាជីវកម្មនោះនឹងទទួលបានអត្ថប្រយោជន៍ជាច្រើនជាក់ជាមិនខានឡើយ។ លើសពីនេះ ក្រសួងពាណិជ្ជកម្ម ទើបតែបានចេញប្រកាស ស្តីពីការកត់ត្រាកិច្ចសន្យាអាជ្ញាប័ណ្ណចំពោះម៉ាក និងកិច្ចសន្យាផ្តល់សិទ្ធិប្រកបអាជីវកម្ម ចុះថ្ងៃទី១៣ខែមករា ឆ្នាំ២០២០កន្លងមកនេះ ក្នុងគោលបំណងលើកកម្ពស់ និងពង្រឹងការគ្រប់គ្រង កិច្ចការកម្មសិទ្ធិបញ្ញាការផ្ទេរបច្ចេកវិទ្យា និងចំណេះជំនាញ ការទាក់ទាញវិនិយោគ ការប្រកបអាជីវកម្ម និងការប្រកួតប្រជែងស្មោះត្រង់ដូច្នេះកិច្ចសន្យាអាជ្ញាប័ណ្ណ ឬកិច្ចសន្យាផ្តល់សិទ្ធិប្រកបអាជីវកម្មត្រូវយកមកកត់ត្រានៅក្រសួងពាណិជ្ជកម្ម ទើបមានអានុភាពអនុវត្តដល់ភាគីទីបី។

ជាចុងបញ្ចប់ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មបានអំពាវនាវ និងលើកទឹកចិត្តដល់បងប្អូនប្រកបអាជីវកម្មគុយទាវទាំងក្នុង និងក្រៅប្រទេសសូមចូលជាសមាជិកសមាគមសហគមន៍ចុងភៅកម្ពុជាឱ្យបានផុសផុល ដើម្បីបានប្រើប្រាស់ម៉ាកសមូហភាព“គុយទាវភ្នំពេញ” ឱ្យបានកាន់តែទូលំទូលាយ ដែលនឹងចូលរួមចំណែក ក្នុងការបំពេញបេសកកម្មកសាងម៉ូដែលអាជីវកម្មជាសមូហភាពមួយប្រកបដោយជោគជ័យដែលនឹងក្លាយជាគំរូអាជីវកម្មដល់វិស័យផ្សេងៗទៀត ដើម្បីលើកស្ទួយជីវភាពរបស់យើងនិងចូលរួមចំណែកក្នុងការកសាងសេដ្ឋកិច្ចជាតិឱ្យបានកាន់តែប្រសើរឡើងថែមទៀត។

ព័ត៌មានថ្មីៗ

សេចក្ដីជូនដំណឹងស្ដីពី៖ ការលក់ផលិតផលខ្មែរក្រោមកម្មវិធីស្ដីពីកិច្ចសហការជំរុញ និងបង្កើនការលក់ផលិតផលខ្មែរនៅស្ថានីយប្រេងឥន្ធនៈភីធីធីតាម បណ្តារាជធានី-ខេត្ត ដំណាក់កាលទី២ ត្រីមាសទី៣ ឆ្នាំ២០២៣

ថ្ងៃទី០៤ ខែកញ្ញា ឆ្នាំ២០២៣ ម៉ោង ០៣:១៥ នាទី យប់

សេចក្តីជូនដំណឹងស្ដីពី៖ តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី ១ ដល់ថ្ងៃទី ១០ ខែកញ្ញា ឆ្នាំ២០២៣

ថ្ងៃទី០១ ខែកញ្ញា ឆ្នាំ២០២៣ ម៉ោង ០៣:០៧ នាទី រសៀល

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ទទួលជួបសម្តែងការគួរសមជាមួយឯកឧត្តម Francisco Kalbuadi Lay ឧបនាយករដ្ឋមន្ត្រី រដ្ឋមន្ត្រីសម្របសម្រួលកិច្ចការសេដ្ឋកិច្ច និងជារដ្ឋមន្ត្រីក្រសួងទេសចរណ៍ និងបរិស្ថាន នៃប្រទេសទីម័រខាងកើត

ថ្ងៃទី២៨ ខែសីហា ឆ្នាំ២០២៣ ម៉ោង ០៧:៣៥ នាទី យប់

ព័ត៌មានថ្មីៗ

ស្លាក