ក្រសួងពាណិជ្ជកម្មបានរៀបចំសិក្ខាសាលាផ្សព្វផ្សាយច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិក ជូនដល់វិស័យឯកជន

(ភ្នំពេញ)៖កាលពីព្រឹកថ្ងៃសុក្រ ១៣កើត ខែផល្គុន ឆ្នាំកុរ ឯកស័ក ព.ស. ២៥៦៣ត្រូវនឹងថ្ងៃទី០៦       ខែមីនា ឆ្នាំ២០២០ នាយកដ្ឋាននីតិកម្មនៃក្រសួងពាណិជ្ជកម្មបានរៀបចំសិក្ខាសាលា​ផ្សព្វផ្សាយ​ច្បាប់​ស្តីពី​ពាណិជ្ជកម្មតាមប្រព័ន្ធអេឡិចត្រូនិកជូនដល់វិស័យឯកជន ដែលប្រព្រឹត្តទៅក្រោមអធិបតីភាព ឯកឧត្តម សុខ សុភ័ក្រ្តរដ្ឋលេខាធិការក្រសួងពាណិជ្ជកម្ម និង​ជាប្រធានអនុគណៈកម្មការ​រៀបចំ​បទប្បញ្ញត្តិ​សម្រាប់អនុវត្តច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកដោយមានការចូលរួម​ពីឯកឧត្តម លោក លោកស្រី តំណាងគ្រឹះស្ថានហិរញ្ញវត្ថុសហគ្រាសធុនតូចនិងមធ្យម ពាណិជ្ជករ អាជីវករ និងក្រុមហ៊ុនឯកជននានាសរុប ៩៦ រូប។

ក្នុងឱកាសបើកសិក្ខាសាលានេះឯកឧត្តម សុខ សុភ័ក្រ្ត មានប្រសាសន៍ថា សិក្ខាសាលា​ផ្សព្វផ្សាយ​ច្បាប់នេះត្រូវបានរៀបចំឡើងក្នុងគោលបំណងបញ្ជ្រាបនូវការយល់ដឹងច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកឱ្យបានទូលំទូលាយដល់វិស័យឯកជនជាពិសេស​បុគ្គលដែលពាក់ព័ន្ធនឹង​ពាណិជ្ជកម្ម​តាមប្រព័ន្ធ អេឡិចត្រូនិកដូចជាក្រុមហ៊ុនផ្តល់សេវាកម្មអ៊ិនធឺណិត គ្រឹះស្ថានធនាគារ​និងក្រុមហ៊ុនផ្តល់​សេវា​ទូទាត់ប្រាក់តាមប្រព័ន្ធអេឡិចត្រូនិកក្រុមហ៊ុនដឹកជញ្ជូន និងបុគ្គលពាក់ព័ន្ធសំខាន់ៗផ្សេងទៀត។ក្រៅអំពីការផ្សព្វផ្សាយខ្លឹមសារទូទៅនៃច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកសិក្ខាសាលា​នេះក៏មានការអញ្ជើញចូលរួមធ្វើបទបង្ហាញពីវាគ្មិនតំណាងក្រសួងប្រៃសណីយ៍​ និងទូរគមនាគមន៍ស្តីពី​កំណត់ត្រាអេឡិចត្រូនិក​​និងហត្ថលេខាអេឡិចត្រូនិកតំណាងធនាគារជាតិ​នៃកម្ពុជា​ស្តីពី​ការទូទាត់/ការ​ផ្ទេរ​ប្រាក់​តាមប្រព័ន្ធអេឡិចត្រូនិកនិងតំណាងអគ្គនាយកដ្ឋាពន្ធដារស្តីពីកាតព្វកិច្ចពន្ធ និងការលើក​ទឹកចិត្ត​សម្រាប់សហគ្រាសធុនតូចនិងមធ្យម។

ឯកឧត្តមរដ្ឋលេខាធិការបានមានប្រសាសន៍បន្តទៀតថា​ដើម្បីអនុវត្តច្បាប់ស្តីពីពាណិជ្ជកម្មតាម​ប្រព័ន្ធ​អេឡិច​ត្រូនិក​​នេះ​ឱ្យមានប្រសិទ្ធភាពក្រសួងពាណិជ្ជកម្ម​បាន​នឹងកំពុងរៀបចំនូវអនុក្រឹត្យស្តីពី​ការអនុវត្តច្បាប់នេះដែលនឹងកំណត់អំពីការលើកលែង ការកំណត់ប្រភេទអាជ្ញាបណ្ណ បែបបទ និង​នីតិវិធី​នៃការ​ផ្តល់ការអនុញ្ញាតឬអាជ្ញាបណ្ណនិងប្រកាសរួមជាមួយ​នឹងក្រសួងប្រៃសណីយ៍និងទូរគមនាគមន៍​ស្តីពីក្រមសីលធម៌វិជ្ជាជីវៈសម្រាប់អន្តរការីនិងបុគ្គលផ្តល់សេវាពាណិជ្ជកម្មតាមប្រព័ន្ធអេឡិចត្រូនិក។

ឯកឧត្តមរដ្ឋលេខាធិការមានជំនឿយ៉ាងមុតមាំថាសិក្ខាសាលានាថ្ងៃនេះ​នឹងជម្រុញនូវការយល់ដឹងអំពី​សិទ្ធកាតព្វកិច្ចនិងការទទួលខុសត្រូវរបស់គ្រឹះស្ថាន ក្រុមហ៊ុន និងសហគ្រាសក្នុងការចូលរួមអនុវត្តច្បាប់​និងបទប្បញ្ញតិពាក់ព័ន្ធនឹងពាណិជ្ជកម្មតាមប្រព័ន្ធអេឡិចត្រូនិក  នៅពេលដែលច្បាប់នេះ​ចូលជាធរមាន​នៅក្នុងខែឧសភាឆ្នាំ២០២០ ខាងមុខនេះ។