ឯកឧត្តមរដ្ឋមន្ត្រីក្រសួងពាណិជ្ជកម្ម ដឹកនាំប្រជុំក្រុមការងារផ្នែកផលិតកម្មកែច្នៃសម្រាប់នាំចេញ និងកិច្ចសម្រួលពាណិជ្ជកម្ម ដើម្បីត្រៀមសម្រាប់កិច្ចប្រជុំវេទិការដ្ឋាភិបាល និងវិស័យឯកជនលើកទី១៩

នៅថ្ងៃទី០៦ ខែមីនា ឆ្នាំ២០២០ ឯកឧត្តមប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម និង​ជា​ប្រធាន​ក្រុមការងារផ្នែកផលិតកម្មកែច្នៃសម្រាប់នាំចេញនិងកិច្ចសម្រួលពាណិជ្ជកម្ម បាន​ដឹក​នាំ​កិច្ចប្រជុំរបស់ក្រុមការងារដើម្បីពិភាក្សាលើសំណើរបស់វិស័យឯកជន ដើម្បី​លើក​ជា​យោបល់​ជូនថ្នាក់ដឹកនាំនៅក្នុងវេទិការដ្ឋាភិបាលនិងវិស័យឯកជន ដែលនឹងដឹកនាំដោយ សម្តេច​អគ្គមហាសេនាបតីតេជោ​នាយករដ្ឋមន្ត្រីនៅថ្ងៃទី០១ ខែមេសា ឆ្នាំ២០២០ ខាង​មុខ​នេះ។ ក្នុងកិច្ចប្រជុំនេះ ភាគីវិស័យឯកជន គឺដឹកនាំដោយឧកញ៉ាវ៉ាន់ ស៊ូអៀង ប្រធាន​សមាគម​រោង​ចក្រ​កាត់ដេរនៅកម្ពុជា ជាសហប្រធានក្រុមការងារ។

ជាកិច្ចចាប់ផ្ដើម ឯកឧត្តមរដ្ឋមន្ត្រី បាន​មាន​មតិ​បើក​ដោយ​វាយ​តម្លៃ​ខ្ពស់​ចំពោះ​កិច្ច​ប្រជុំ​កន្លង​មកដែលជាយន្តការដ៏ល្អប្រសើរមួយដែលបាន​និង​កំពុង​ទទួល​នូវ​ការ​កោតសរសើរ​ពី​វិស័យ​ឯកជនអ្នកវិនិយោគិន និងមហាជនទាំងក្នុង និងក្រៅប្រទេស។ ក្រុម​ការ​ងារ​ក៏បាន​ជួប​ប្រជុំ​ជា​បន្ត​បន្ទាប់ដោយបានពិភាក្សា និងរកដំណោះស្រាយនូវបណ្តាបញ្ហាប្រឈមនានា ដែលបាន​លើក​ឡើង​ដោយវិស័យឯកជនរហូតទទួលបាននូវលទ្ធផលល្អប្រសើរ។

កិច្ចប្រជុំនាថ្ងៃនេះបានពិភាក្សាយ៉ាងសស្រាក់សស្រាំលើប្រធានបទជាច្រើនរួមមាន​កិច្ច​សម្រួល​ពាណិជ្ជកម្ម ការចេញវិញ្ញាបនបត្រដើមកំណើតទំនិញ សេវាកម្មនៅកំពង់ផែនិង​ការ​ដឹក​ជញ្ជូន​ទំនិញ ការធ្វើអធិការកិច្ចលើផលិតផលក្រណាត់ពណ៌ត្រីអ៊ី និង​ថ្លៃអគ្គិសនី​សម្រាប់​សហគ្រាសនិង​រោងចក្រ។

ជាលទ្ធផល អង្គប្រជុំ​បានវាយតំលៃខ្ពស់ចំពោះកិច្ចពិភាក្សា​ដ៏មានតំលៃនេះដែល​បាន​ធ្វើ​ការ​ផ្លាស់​ប្តូរ​យោបល់គ្នា ដើម្បីរកនូវដំណោះស្រាយសមស្របនិងមានភាពយោគយល់ខ្ពស់។ ជា​ជំហានបន្ទាប់ ក្រសួងពាណិជ្ជកម្មនឹងធ្វើរបាយការណ៍ និងលើក​សំណើ​មួយ​ចំនួន​ទៅ​ក្រុម​ការ​ងារ​ពាក់​ព័ន្ធដទៃទៀតដើម្បីពិនិត្យ និងរកដំណោះស្រាយ។ ចំពោះ​សំណើ​ដែល​ក្រសួង​ពាណិជ្ជកម្ម​អាចដោះស្រាយបានក្រសួងនឹងពិនិត្យ និងដោះស្រាយជូនវិស័យឯកជន តាម​ការ​សម​ស្រប។