កិច្ចប្រជុំការចរចាជុំទីពីរ លើកិច្ចព្រមព្រៀងពាណិជ្ជកម្មសេរីកម្ពុជា-ចិន

(រាជធានីភ្នំពេញ)៖ ទោះបីជាព្រះរាជាណាចក្រកម្ពុជានិងសាធារណរដ្ឋប្រជាមានិតចិ​ន កំពុងស្ថិតក្នុងកាលៈទេសៈ ប្រយុទ្ធប្រឆាំង​នឹង​ការរីករាលដាលនៃជំងឺកូវីដ១៩តែដើម្បីអនុវត្តតាមការណែនាំរបស់រាជរដ្ឋាភិបាលកម្ពុជា និងដោយមានការអនុញ្ញាត​ដ៏ខ្ពង់ខ្ពស់​ពី​ឯកឧត្តម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម នៅថ្ងៃទី០៩ ខែមេសា ឆ្នាំ២០២០ ឯកឧត្តម សុខ សុភ័ក្រ្ត រដ្ឋលេខាធិការ​ក្រសួង​ពាណិជ្ជកម្ម និងសមភាគីចិន ដឹកនាំដោយ ឯកឧត្តម យ៉ាង ចឹងវ៉ី (YangZhengwei) អគ្គនាយករងក្រសួងពាណិជ្ជកម្មចិន បានបើកការចរចាជុំទីពីរលើកិច្ចព្រមព្រៀងពាណិជ្ជកម្មសេរីកម្ពុជា-ចិន តាមប្រព័ន្ធវីដេអូ(Video Conference) ។

គោលបំណងនៃកិច្ចប្រជុំនេះ គឺដើម្បីពិនិត្យនិងតាមដានវឌ្ឍនភាពទូទៅនៃការចរចារបស់អនុក្រុមការងារនីមួយៗ និងពិនិត្យ និង​ផ្តល់​គោលការណ៍សម្រាប់ដោះស្រាយបញ្ហាសំខាន់ៗសំដៅបញ្ចប់ការចរចាក្នុងឆ្នាំ២០២០ ខាងមុខនេះ។

ភាគីទាំងពីរបានឯភាពថានឹងបន្តគាំទ្រគ្នាទៅវិញទៅមកក្នុងការទប់ស្កាត់នឹងជំងឺឆ្លងកូវីដ១៩ដែលកំពុងបណ្តាល​ឱ្យសេដ្ឋកិច្ច​ក្នុង​តំបន់ និងពិភពលោកមានការធ្លាក់ចុះយ៉ាងខ្លាំងធ្វើឱ្យមានផលប៉ះពាល់ដល់ជីវភាពរស់នៅនៃប្រជាជនយើង ហើយក៏មានការ​យល់​ស្រប​គ្នាដែរថា ការបញ្ចប់ការចរចាលើកិច្ចព្រមព្រៀងពាណិជ្ជកម្មសេរីកម្ពុជា-ចិនពិតជានឹងជួយដល់​ការ​ស្តារ​ឡើង​វិញនៃ​សេដ្ឋកិច្ច​នៃ​ប្រទេសទាំងពីរ ក៏ដូចជាសេដ្ឋកិច្ចនៃបណ្តាប្រទេសក្នុងតំបន់។

ភាគីទាំងពីរ បានវាយតម្លៃខ្ពស់ចំពោះវឌ្ឍនភាពនិងលទ្ធផលសម្រេចបានដោយក្រុមការងារទាំង១០ ដែលទោះបី​ជាក្នុង​រយៈពេល​ខ្លីនិងក្នុងកាលៈទេសៈដែលប្រទេសទាំងពីរកំពុងជួបប្រឈម តែនៅសម្រេចបាននូវលទ្ធផលយ៉ាងល្អប្រសើរដោយបានឯកភាព​គ្នានូវ​ជំពូកសំខាន់ៗ ដូចជា ជំពូកកិច្ចសហប្រតិបត្តិការវិនិយោគកិច្ចសហប្រតិបត្តិការសេដ្ឋកិច្ច និងបច្ចេកទេស គំនិតផ្តួច​ផ្តើមខ្សែ​ក្រវាត់ និងផ្លូវនិងពាណិជ្ជកម្មតាមប្រព័ន្ធអេឡិចត្រូនិក។ ចំពោះស្តីពីវិធានប្រភពដើមទំនិញ នីតិវិធីគយនិងសម្រួលពាណិជ្ជកម្ម អនាម័យ និងភូតគាមអនាម័យ របាំងបច្ចេកទេសមិនមែនពន្ធភាគីទាំងពីរបានឯកភាពជាគោលការណ៍ និងកំពុងបន្ត​ពិភាក្សា​លើ​ចំណុច​ដែលខ្វែងគំនិតគ្នាបន្តិចបន្តួចតាមរយៈវីដេអូ និងអ៊ីម៉ែល ឱ្យបានយ៉ាងយូរបំផុតនៅពាក់កណ្តាលខែឧសភា ឆ្នាំ២០២០ ខាងមុខនេះ។   

ចំពោះជំពូកសំខាន់ៗរួមមានពាណិជ្ជកម្មទំនិញ និងពាណិជ្ជកម្មសេវាកម្ម ភាគីទាំងពីរបានផ្លាស់ប្តូរយោបល់អំពីបញ្ហាប្រឈមនិង​ផលប្រយោជន៍នៃប្រទេសនីមួយៗ ដោយឯកភាពថានឹងផ្តល់ភាពទន់ភ្លន់ឱ្យគ្នាទៅវិញទៅមក។

ប្រធានក្រុមចរចានៃប្រទេសទាំងពីរ បានណែនាំឲ្យអនុក្រុមការងារពន្លឿនការពិភាក្សានិងដោះស្រាយបញ្ហាសំខាន់ៗ​សេស​សល់​ទាំង​នេះ ទោះបីជាតាមប្រព័ន្ធអនឡាញក៏ដោយសំដៅបញ្ចប់ជំពូកថ្មីៗបន្ថែមឲ្យបានមុនកិច្ចប្រជុំបន្ទាប់ ដែលគ្រោងធ្វើនៅខែមិថុនាខាងមុខនេះ។

ភាគីទាំងពីរបានស្វាគមន៍ចំពោះការប្តេជ្ញាចិត្តយ៉ាងមោះមុតរបស់ប្រទេសទាំងពីរក្នុងការបំពេញតួនាទីយ៉ាងសកម្មទោះបីជាមាន​ឧបសគ្គ​មិនអាចចូលរួមកិច្ចប្រជុំផ្ទាល់ ការជួបប្រជុំតាមប្រព័ន្ធអនឡាញនេះ​ផ្តល់​ឱកាស​ឲ្យក្រុមការងារ​ទាំង​សង​ខាង​ពន្លឿន​ការ​ងារ​របស់ខ្លួន​បន្តទៀតសំដៅសម្រេចបាននូវអាណត្តិផ្តល់ឲ្យដោយប្រមុខរដ្ឋាភិបាលនៃប្រទេសទាំងពីរ សម្រាប់ជា​ផលប្រយោជន៍រួម​សម្រាប់​ប្រជាជននៃប្រទេសទាំងពីរ។

កិច្ចប្រជុំក្រុមការងារ លើកទី៣គ្រោងនឹងប្រារព្ធធ្វើឡើងនៅក្នុងខែមិថុនា ឆ្នាំ២០២០ ខាងមុខ។