ថ្នាក់ដឹកនាំក្រសួងពាណិជ្ជកម្ម អញ្ជើញដាក់កម្រងផ្កា គោរពវិញ្ញាណក្ខន្ធបុព្វការីជន និងវីវជនកម្ពុជា

(ភ្នំពេញ)៖ នៅស្តូបវិមានឯករាជ្យ កាលពីរសៀលថ្ងៃទី០៨ ខែវិច្ឆិកា ឆ្នាំ២០១៩ ឯកឧត្តម កឹម ស៊ីថន រដ្ឋលេខាធិការប្រចាំការ តំណាងរបស់​ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានដឹកនាំមន្ត្រីរាជការក្រោមឱវាទ​អញ្ជើញដាក់កម្រងផ្កា ឧទ្ទិសដល់​ដួងវិញ្ញាណក្ខន្ធបុព្វការីជន និងវីរជនស្នេហាជាតិ ដែលបាន​ពលីជីវិតក្នុងបុព្វហេតុការពារទឹកដី ព្រៃព្រឹក្សា និងប្រជាជនកម្ពុជា។

បន្ទាប់មក ឯកឧត្តម កឹម ស៊ីថន និងប្រតិភូ ក៏បានបន្តដំណើរអញ្ជើញទៅគោរពព្រះវិញ្ញាណក្ខន្ធ អតីតព្រះមហាវីរក្សត្រឆ្នើមរបស់កម្ពុជា គឺព្រះករុណា ព្រះបាទសម្ដេច នរោត្តម សីហនុ ព្រះបរមរតនកោដ្ឋ នៅក្នុងឱកាសដែលព្រះរាជាណា​ចក្រ​កម្ពុជា ប្រារព្ធខួបអនុស្សាវរីយ៍ លើកទី៦៦ នៃទិវាបុណ្យឯករាជ្យជាតិ ថ្ងៃទី​០៩ ខែវិច្ឆិកា និងទិវាកំណើតនៃកងយុទ្ធពលខេមរភូមិន្ទ។

រៀងរាល់ឆ្នាំ ព្រះរាជាណាចក្រកម្ពុជា តែងប្រារព្ធទិវាប្រវត្តិសាស្ត្រនេះយ៉ាងមហោឡារិក ដើម្បីបង្ហាញមហាកម្លាំងសាមគ្គីជាតិ និងសម្តែងនូវ​ទឹកចិត្តសោមនស្សអបអរចំពោះ សម្តេចព្រះបរមរតនកោដ្ឋ ដែលព្រះអង្គបានលះបង់ព្រះកាយពល និងព្រះបញ្ញាញាណ ធ្វើការតស៊ូក្នុង​ក្របខណ្ឌព្រះរាជបូជនីយកិច្ច ទាមទារឯករាជ្យខ្មែរពីអាណានិគមនិយមបារាំង រហូតទទួលបានជោគជ័យ នៅថ្ងៃទី០៩ ខែវិច្ឆិកា ឆ្នាំ១៩៥៣៕