ក្រសួងពាណិជ្ជកម្មរៀបចំគម្រោងផ្តួចផ្តើមថ្មីដើម្បីជួយឱ្យសហគ្រាសធុនតូច និងមធ្យមទទួលបានផលប្រយោជន៍ពីការធ្វើពាណិជ្ជកម្មតាមប្រព័ន្ធអេឡិចត្រូនិក

(ភ្នំពេញ)៖ នាថ្ងៃទី០៨ ខែតុលា ឆ្នាំ២០១៩ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម បានអញ្ជើញធ្វើជាអធិបតីភាពក្នុងកិច្ចប្រជុំគណៈកម្មការវាយតម្លៃសំណើគម្រោងមួយ ក្នុងគោលបំណងស្វែងរកធាតុចូល និងពិនិត្យសុពលភាពលើសំណើគម្រោង Go4eCAM មុននឹងដាក់ជូនគម្រោងថ្មីនេះទៅកម្មវិធី Enhanced Integrated Framework (EIF) របស់អង្គការពាណិជ្ជកម្មពិភពលោក (WTO) ធ្វើការអនុម័ត និងផ្ដល់ហិរញ្ញប្បទានដើម្បីអនុវត្ត។ កិច្ចប្រជុំនេះមានការអញ្ជើញចូលរួមពីឯកឧត្តម លោកជំទាវរដ្ឋលេខាធិការ  អនុរដ្ឋលេខាធិការ អគ្គនាយក និងនាយកដ្ឋានពាក់ព័ន្ធនៃក្រសួងពាណិជ្ជកម្ម តំណាងអន្តរក្រសួង និងដៃគូអភិវឌ្ឍសរុបប្រមាណជាង ៣៥នាក់។

លោកជំទាវ តឹករ៉េត កំរង បានមានប្រសាសន៍ថា Go4eCAM គឺជាគំនិតផ្តួចផ្តើមគម្រោងថ្មីមួយទៀតរបស់ ក្រសួងពាណិជ្ជកម្ម ដែលមានគោលបំណងជួយឱ្យសហគ្រាសធុនតូច និងមធ្យមទទួលបានផលប្រយោជន៍ពីការធ្វើពាណិជ្ជកម្មតាមប្រព័ន្ធអេឡិចត្រូនិក និងចូលរួមបានពេញលេញនៅក្នុងសេដ្ឋកិច្ចឌីជីថល តាមរយៈការជំរុញ និងបង្កើនការលក់ ឬការធ្វើពាណិជ្ជកម្មតាមប្រព័ន្ធអេឡិចត្រូនិក ការពង្រីកអាជីវកម្ម និងការបង្កើតការងារសម្រាប់សង្គម។ សសរស្ដម្ភដ៏សំខាន់នៃគម្រោង Go4eCAM គឺការបង្កើតទីផ្សារអេឡិចត្រូនិកជាលក្ខណៈ B2B ដើម្បីផ្ដល់ឱកាសជូនដល់សហគ្រានធុនតូច និងមធ្យម ក៏ដូចជាផលិតករកម្ពុជាដទៃទៀត ជាពិសេសសហគ្រាសស្ត្រី អាចជ្រៀតចូលក្នុងទីផ្សារទូលំទូលាយ និងទទួលបានអតិថិជនកាន់តែច្រើនតាមរយៈទីផ្សារពាណិជ្ជកម្មដែលមិនមានព្រំដែន។ វត្ថុបំណងនៃទីផ្សារនេះគឺជំរុញការលក់ផលិតផលកម្ពុជាឆ្លងព្រំដែនតាមរយៈការធ្វើពាណិជ្ជកម្មតាមប្រព័ន្ធអេឡិចត្រូនិក ប៉ុន្តែក៏អាចបម្រើដល់ការលក់ក្នុងស្រុកផងដែរ តាមរយៈការតភ្ជាប់សហគ្រាស និងផលិតកម្មនៅតាមខេត្ត ជាមួយនឹងអតិថិជននៅតំបន់ទីក្រុង។ ក្រៅពីនេះ គម្រោង Go4eCAM នឹងជួយគាំទ្រផងដែរដោយលើកកំពស់សហគ្រិនភាព នវានុវត្តន៍ ការចាប់ផ្តើមអាជីវកម្មថ្មី និងការទទួលបានឥណទានតាមរយៈការផ្គូផ្គងជាមួយនឹងអ្នកវិនិយោគ។ 

គម្រោង Go4eCAM កំណត់នូវលទ្ធផលធំៗ ចំនួន ៤ សម្រាប់អនុវត្ត ដូចខាងក្រោម៖ 

• លទ្ធផលទី១៖ បង្កើតឱ្យមានបរិយាកាសធ្វើអាជីវកម្មតាមរយៈពាណិជ្ជកម្មតាមប្រព័ន្ធអេឡិចត្រូនិកសម្រាប់សហគ្រាសខ្នាតតូច និងមធ្យម ដើម្បីបង្កើនឱកាសធ្វើពាណិជ្ជកម្ម ពង្រីកអាជីវកម្ម និងបង្កើតការងារថ្មីៗ តាមរយៈការចូលរួមក្នុងទីផ្សារអេឡិចត្រូនិច B2B2C សម្រាប់ការធ្វើពាណិជ្ជកម្មឆ្លងព្រំដែន ដែលមានការទូទាត់តាមប្រព័ន្ធអេឡិចត្រូនិក និងសេវាភស្ដុភារកម្ម ស្របតាមស្តង់ដារអន្តរជាតិ និងការអនុវត្តល្អៗ។
• លទ្ធផលទី ២៖ ពង្រឹងខ្សែសង្វាក់តម្លៃពាណិជ្ជកម្មតាមប្រព័ន្ធអេឡិចត្រូនិក តាមរយៈការបង្កើនសមត្ថភាពជំនាញសហគ្រិនភាព និងការទទួលបានហិរញ្ញវត្ថុរបស់សហគ្រាសធុនតូច និងមធ្យម ដែលមានសកម្មភាពធ្វើពាណិជ្ជកម្មក្នុងទីផ្សារអេឡិចត្រូនិក B2B2C ។
• លទ្ធផលទី ៣៖ បង្កើតឱ្យមានលទ្ធភាពនៃការទទួលបានហិរញ្ញប្បទានពីប្រភពក្នុងស្រុក និងអន្តរជាតិសម្រាប់ដំណើការសហគ្រាសពាណិជ្ជកម្មតាមប្រពន្ធ័អេឡិកត្រូនិក ដែលអាចបង្កើតការងារជំនាញសម្រាប់សហគ្រាសធុនតូច និងមធ្យមកម្ពុជា និងមានការវិនិយោគបន្ថែមនៅក្នុងវិស័យពាណិជ្ជកម្មតាមអេឡិចត្រូនិកផ្លូវការនៅកម្ពុជាដោយវិនិយោគិនក្នុងស្រុក និងក្រៅប្រទេស។
• លទ្ធផលទី ៤៖ គម្រោង Go4eCAM សម្រេចបាននូវទិសដៅ និងគោលបំណង ហើយត្រូវបានត្រួតពិនិត្យវាយតម្លៃ និងធ្វើសវនកម្ម ហើយសកម្មភាពការងារទាំងឡាយនៃការអនុវត្តគម្រោង នឹងត្រូវយកមកផ្សព្វផ្សាយតាមប្រព័ន្ធពត៌មាននានាឱ្យបានទូលំទូលាយជាសាធារណៈ។

ជាសេចក្ដីសន្និដ្ឋាន ក្រសួងពាណិជ្ជកម្ម តំណាងក្រសួងប្រៃសណីយ៍ និងទូរគមនាគមន៍ ក្រសួងឧស្សាហកម្ម និងសិប្បកម្ម អគ្គនាយកដ្ឋានគយ និងរដ្ឋាករកម្ពុជា និងតំណាងដៃគូអភិវឌ្ឍន៍រួមមាន UNDP, EU, GIZ, DFAT (Australia) បានសម្ដែងការស្វាគមន៍លើសំណើគម្រោង Go4eCAM។ ក្រោយពីមានការអនុម័តលើសំណើគម្រោងខាងលើ ក្រសួងពាណិជ្ជកម្មនឹងដាក់សំណើគម្រោង Go4eCAM ជាផ្លូវការជូនទៅកម្មវិធី EIF របស់អង្កការពាណិជ្ជកម្មពិភពលោក ដើម្បីពិនិត្យនិងអនុម័តនៅចុងខែធ្នូ ឆ្នាំ២០១៩ ខាងមុនេះ។