ឯកឧត្តម សំហេង បូរ៉ា បានអញ្ជើញចូលរួមកិច្ចប្រជុំលើកទី៤ នៃអ្នកដឹកនាំពាណិជ្ជកម្មសេដ្ឋកិច្ចអាស៊ី​​ ២០១៩ ( The 4th ABLC 2019)

(សិង្ហបុរី)៖ នាថ្ងៃទី០៨​ ខែវិច្ឆិកា ឆ្នាំ២០១៩ ​ឯកឧត្តម សំហេង បូរ៉ា អនុរដ្ឋលេខាធិការ តំណាងរបស់ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានចូលរួមកិច្ចប្រជុំលើកទី៤ នៃអ្នកដឹកនាំពាណិជ្ជកម្មសេដ្ឋកិច្ចអាស៊ី​​ ២០១៩ (The 4^th ABLC 2019) ដែលបានរៀបចំឡើងក្នុងសណ្ឋាគារ Marina Bay Sands​។ កិច្ចប្រជុំនេះក៏ត្រូវបានចាត់ទុកជាវេទិកាយ៉ាងសំខាន់មួយរបស់ថ្នាក់​ដឹកនាំ​ និង​​ប្រធាន​ក្រុម​ហ៊ុននៅ​តំបន់​អាស៊ី​​ ចូល​រួម​​ធ្វើ​បទ​បង្ហាញអំពីការវិនិយោគ ការធ្វើពាណិជ្ជកម្មរបស់ខ្លួន ក្នុងនោះក៏មានជាកិច្ច​ជំនួប​ពិភាក្សា​ផ្លាស់​ប្តូរយោបល់​ (Interactive Talk Show)​ ក្នុង​គោលបំណងផ្លាស់ប្តូរយោបល់ ការចែករំលែកពីការធ្វើបច្ចុប្បន្នភាពពាណិជ្ជកម្ម ការធ្វើពាណិជ្ជកម្មតាមបែបឌីជីថល និងការពង្រឹងភាពជាដៃគូពាណិជ្ជកម្ម ក៏​ដូច​ជា​ការ​ច្នៃ​ប្រឌិតថ្មី​រវាងបណ្តាប្រទេសដែលបានអញ្ជើញ​​​ចូលរួមផង​ដែរ។

ក្នុងវេទិកាពិភាក្សាផ្លាស់ប្តូរយោបល់ (Interactive Talk Show) ក្រោមប្រធានបទ​ “ The Future of Asia In a Technology-Driven World ” ឯកឧត្តមបានចែករំលែកពី​បទ​ពិសោធន៍​នៃ​​បចេ្ចកវិទ្យាក្នុងទិដ្ឋភាពពាណិជ្ជកម្មក្នុងតំបន់ បន្ថែមពីនេះក៏បានបង្ហាញពីតួនាទីយ៉ាងសំខាន់របស់បច្ចេកវិទ្យាដែលបានជំរុញយ៉ាងលឿនក្នុងការអភិវឌ្ឍប្រទេសកម្ពុជានាពេលបច្ចុប្បន្ន និងអនាគត។ ក្នុងវេទិកានេះ ក៏មានការចែករំលែកយោបល់ អំពីការចាប់ផ្តើមរក្សានៅភាពលេចធ្លោ​របស់បច្ចេកវិទ្យាថ្មី ស្តីពី Artificial Intelligence (AI) ការវិនិយោគលើការអប់រំដើម្បីពន្លឿនការសិក្សាស្រាវ​ជ្រាវ និងអភិវឌ្ឍន៍​​បច្ចេកវិទ្យាថ្មីៗ ដូចជា AI, Machine Learning, 3D Printing​ជាដើម បន្ថែមពីនេះក៏​មានការពិភាក្សាលើឱកាសនៃការរីកចម្រើនរបស់ផលិតកម្មក្នុងឧស្សាហកម្ម៤.០។

ឆ្លៀតក្នុងឱកាស​នេះ​​ ឯកឧត្តម សំហេង បូរ៉ា ​បានផ្តល់កិត្តិយសក្នុង​ការ​ចែក​​វិញ្ញាបនបត្រ​​ដល់​សហគ្រិន​ឆ្នើម​ ដែល​បានចូល​រួម​ក្នុង​កិច្ចប្រជុំ​កន្លង​មក​ ក្នុង​ការ​ចែក​រំ​លែក​បទ​ពិសោធន៍​នៃការ​ដឹកនាំ​ក្រុម​ហ៊ុន​ ក៏​ដូច​ជាការ​បញ្ចេញ​​មតិ​យោបល់​ទៅ​លើ​ការ​អភិវឌ្ឍ​សេដ្ឋកិច្ចពាណិជ្ជកម្ម​​នៅតាម​​​បណ្តា​ប្រទេសនៃ​​តំនប់​អាស៊ី​ផងដែរ។

អត្ថបទ និងរូបភាព៖ នាយកដ្ឋានកិច្ចការពិព័រណ៍