ថ្ងៃទី១១ ខែកញ្ញា ឆ្នាំ២០២០ ម៉ោង ០៣:០២ នាទី រសៀល

👁 0

ថ្លែងក្នុងពិធីបើកសិក្ខាសាលានេះ ឯកឧត្តមរដ្ឋលេខាធិការ បានជម្រាបជូនពីប្រវត្តិនៃការចូលរបស់កម្ពុជាជាសមាជិកនៃអង្គការពាណិជ្ជកម្មពិភពលោក ដោយកម្ពុជាជាប្រទេសអភិវឌ្ឍន៍តិចតួចដំបូងបង្អស់ដែលបានក្លាយជាសមាជិករបស់អង្គការពាណិជ្ជកម្មពិភពលោកនៅឆ្នាំ២០០៤។ នៅក្នុងប្រព័ន្ធពាណិជ្ជកម្មពហុភាគីនេះ កម្ពុជាបានបង្កើនសមត្ថភាពរបស់ខ្លួនបន្តិចម្ដងៗ ហើយនៅឆ្នាំ ២០១៧ កម្ពុជាបានដើរតួជាអ្នកសម្របសម្រួលក្រុមប្រទេសអភិវឌ្ឍន៍តិចតួចនៅអង្គការពាណិជ្ជកម្មពិភពលោក ព្រមទាំងបានដឹកនាំក្រុមប្រទេសនេះក្នុងសន្និសីទថ្នាក់រដ្ឋមន្រ្តីអង្គការពាណិជ្ជកម្មពិភពលោកលើកទី១១ នៅប្រទេសអាហ្សង់ទីនផងដែរ។ 

ទោះជាយ៉ាងនេះក្ដី ឯកឧត្តមរដ្ឋលេខាធិការ បានជម្រាបជូនពីសារៈសំខាន់ក្នុងការបន្តអភិវឌ្ឍន៍សមត្ថភាពក្នុងការចរចាពាណិជ្ជកម្ម ជាពិសេសក្នុងខណៈពេលដែលកម្ពុជាកំពុងតែចរចាកិច្ចព្រមព្រៀងពាណិជ្ជកម្មសេរីទ្វេភាគីជាមួយនឹងដៃគូ ដែលទាមទាឲ្យកម្ពុជាធ្វើការត្រៀមខ្លួនឲ្យបានច្បាស់លាស់ទាំងគោលដៅនយោបាយ ការវិភាគផលចំណេញនិងផលប៉ះពាល់ យុទ្ធសាស្ត្រចរចា និង   សមត្ថភាពចរចារបស់មន្ត្រីចរចាផ្ទាល់ ដើម្បីទាញយកផលប្រយោជន៍ឲ្យបានពេញលេញពីការចរចា។ ដូចនេះ សិក្ខាសាលាស្តីពីការចរចារពាណិជ្ជកម្មនេះ គឺជាការអន្តរាគមន៍ទាន់ពេលវេលាមួយសម្រាប់កម្ពុជា ក្នុងការពង្រឹង និងពង្រីកសមត្ថភាពចរចារបស់កម្ពុជា។

សិក្ខាសិលានេះជាផ្នែកមួយនៃគម្រោងក្រោមជំនួយហិរញ្ញវត្ថុពីសហភាពអឺរ៉ុបប្រចាំកម្ពុជា និងក្រសួងសហប្រតិបត្តិការសេដ្ឋកិច្ច និងការអភិវឌ្ឍន៍អាល្លឺម៉ង់ (BMZ) ដោយមានអ្នកចូលរួមសរុបជាង ១០០នាក់មកពីក្រសួង និងស្ថាប័នពាក់ព័ន្ធ មួយចំនួន៕