សេចក្តីជូនដំណឹងស្ដីពី៖ ការអនុវត្តន៍ចំពោះសាធារណជន ដែលមានភារកិច្ចអញ្ជើញមកទំនាក់ទំនងការងារ ឬមកទទួលសេវាសាធារណៈ នៅទីស្ដីការក្រសួងពាណិជ្ជកម្ម

ក្រសួង​ពាណិជ្ជកម្ម មានកិត្តិយសសូម​ជម្រាប​ជូនដំណឹង​ដល់ អ្នកឧកញ៉ា លោកឧកញ៉ា លោក លោកស្រី អ្នកនាងកញ្ញា ឬអ្នកតំណាងស្របច្បាប់ក្នុងការស្នើសុំសេវាសាធារណៈទាំងអស់ជ្រាបថា ក្នុង​គោលបំណង​ដើម្បី​កាត់​បន្ថយ​ហានិភ័យ និង​ចូលរួមទប់ស្កាត់ការរីករាលដាលនៃជំងឺកូវីដ-១៩ ក្រសួង​ពាណិជ្ជកម្ម​​នឹង​​តម្រូវ​ឱ្យ ​អ្នកឧកញ៉ា លោកឧកញ៉ា លោក លោកស្រី អ្នកនាង កញ្ញា ឬអ្នកតំណាង​ស្រប​​ច្បាប់​ក្នុង​ការស្នើ​សុំសេវា​សាធារណៈ ដែលមានភារកិច្ចអញ្ជើញមកទំនាក់ទំនងការងារ ឬមកទទួលសេវាសាធារណៈ នៅទីស្ដីការក្រសួងពាណិជ្ជកម្ម ត្រូវអនុវត្តដូចខាងក្រោម៖

១- ត្រូវអនុវត្ត​វិធានការ​អនាម័យការពារ​ខ្លួនឱ្យ​បានខ្ជាប់ខ្លួនជាប្រចាំ (ពាក់ម៉ាស់ លាងដៃនឹងអាល់កុល ឬជែល​អាល់កុល ឬសាប៊ូឱ្យបានញឹកញាប់ និងរក្សាគម្លាតសុវត្ថិភាពបុគ្គល ។ល។) និងវិធានការ​ណែ​នាំ​​​របស់​​ក្រសួងសុខាភិបាល ជាពិសេសគឺ វិធានការ «៣កុំ ៣ការពារ» របស់ ​សម្តេច​អគ្គ​មហា​សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា

២- ត្រូវធ្វើតេស្តរហ័សរកអង់ទីហ្សែនកូវីដ-១៩ ឬត្រូវមានលិខិតបញ្ជាក់ពីក្រុមហ៊ុន-សហគ្រាស អំពី​ការធ្វើ​​តេស្តរហ័សរកអង់ទីហ្សែនកូវីដ-១៩ រាល់ពេលចេញ-ចូល ទីស្ដីការក្រសួងពាណិជ្ជកម្ម

៣- ចំពោះបុគ្គលដែលមកទំនាក់ទំនងការងារ ឬមកទទួលសេវាសាធារណៈជាប្រចាំ​នៅទីស្ដីការ​ក្រសួង​ពាណិជ្ជកម្ម ត្រូវធ្វើតេស្តរហ័សរកអង់ទីហ្សែនកូវីដ-១៩ ឬត្រូវមានលិខិតបញ្ជាក់ពីក្រុមហ៊ុន-សហគ្រាស អំពីការធ្វើតេស្តរហ័សរកអង់ទីហ្សែនកូវីដ-១៩ ជារៀងរាល់ ០១សប្ដាហ៍ម្ដង ។

អាស្រ័យដូចបានជម្រាបជូនខាងលើ សូម អ្នកឧកញ៉ា លោកឧកញ៉ា លោក លោកស្រី អ្នកនាងកញ្ញា  ឬ​​​អ្នកតំណាងស្របច្បាប់ក្នុងការស្នើសុំសេវាសាធារណៈទាំងអស់ ដែលមានភារកិច្ចអញ្ជើញមក​ទំនាក់​ទំនង​ការងារ ឬមកទទួលសេវាសាធារណៈ នៅទីស្ដីការក្រសួងពាណិជ្ជកម្ម ត្រូវចូលរួមអនុវត្ត​តាមសេចក្ដី​ជូន​ដំណឹង​នេះឱ្យមានប្រសិទ្ធភាពប្រកបដោយស្មារតីទទួលខុសត្រូវខ្ពស់។

សូ ម អ រ គុ ណ !