ក្រសួងពាណិជ្ជកម្ម

ឯកឧត្ដម ប៉ាន សូរស័ក្តិ ផ្ញើសារគោរពជូនពរ សម្ដេចតេជោនាយករដ្ឋមន្ត្រី ក្នុងឱកាសចម្រើនជន្មាយុគម្រប់ ៦៩ឆ្នាំ ឈានចូល ៧០ឆ្នាំ

ថ្ងៃទី០៤ ខែសីហា ឆ្នាំ២០២១ ម៉ោង ០៥:១៨ នាទី ល្ងាច

👁 10

សារលិខិតជូនពរ

…

សូមគោរពជូន សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ជាទីគោរពដ៏ខ្ពង់ខ្ពស់ !

ក្នុងឱកាសដ៏ប្រសើរប្រពៃថ្លៃថ្លានៃពិធីចម្រើនជន្មាយុគម្រប់ ៦៩ឆ្នាំ ឈានចូល ៧០ឆ្នាំ របស់ សម្តេចតេជោនាយករដ្ឋមន្ត្រី នៃព្រះរាជាណាចក្រកម្ពុជា ដែលនឹងប្រព្រឹត្តទៅនៅថ្ងៃទី៥ ខែសីហា ឆ្នាំ២០២១ ខាងមុខនេះ តាងនាមថ្នាក់ដឹកនាំ មន្ត្រីរាជការទាំងអស់នៃក្រសួងពាណិជ្ជកម្ម និងក្នុងនាមខ្លួនខ្ញុំផ្ទាល់ សូមសម្តែងនូវសេចក្តីអំណរសាទរ ដោយស្មោះអស់ពីដួងចិត្ត និងសូមគោរពជូនពរជ័យ សិរីមង្គល វិបុលសុខដ៏មហាប្រសើរគ្រប់ប្រការគោរពជូនចំពោះ សម្តេចតេជោនាយករដ្ឋមន្ត្រី សូមមានសុខភាពល្អបរិបូរណ៍ កម្លាំងពលាំងមាំមួន បញ្ញាឈ្លាសវៃ និងជន្មាយុយឺនយូរ។

ព្រះរាជាណាចក្រកម្ពុជា ក្រោមការដឹកនាំដ៏ប៉ិនប្រសប់ និងឈ្លាសវៃប្រកបដោយគតិបណ្ឌិតរបស់ សម្តេចតេជោនាយករដ្ឋមន្ត្រី ទទួលបាននូវសុខសន្តិភាពពេញលេញ អធិបតេយ្យភាព ឯកភាពជាតិ បូរណភាពទឹកដី ស្ថិរភាពនយោបាយ សន្តិសុខសង្គម និងសណ្តាប់ធ្នាប់សាធារណៈ ព្រមទាំងធ្វើឱ្យនាវាកម្ពុជាមានការអភិវឌ្ឍ និងរីកចម្រើនលើគ្រប់វិស័យ តាមរយៈការដាក់ចេញនូវយុទ្ធសាស្រ្ត និងគោលនយោបាយនានារបស់រាជរដ្ឋាភិបាល។ ផលនៃការកើតឡើងដែលជាស្នាដៃរបស់ សម្តេចតេជោនាយករដ្ឋមន្ត្រី ធ្វើឱ្យប្រជាជនទូទាំងប្រទេសគាំទ្រ គោរពស្រឡាញ់ដ៏ជ្រាលជ្រៅ គោរពកោតស្ញប់ស្ញែងយ៉ាងក្រៃលែង កតញ្ញុតាធម៌ និងកតវេទិតាធម៌យ៉ាងស្មោះស្ម័គ្របំផុត។ ជាក់ស្តែងក្នុងដំណាក់កាលនៃការរីករាលដាលជំងឺកូវីដ-១៩ សម្តេចតេជោនាយករដ្ឋមន្ត្រី បានខិតខំប្រឹងប្រែងពុះពារយ៉ាងលំបាក ជំនះឧបសគ្គគ្រប់បែបយ៉ាង ប្រយុទ្ធប្រឆាំងយ៉ាងសកម្មនឹងការឆ្លងរីករាលដាលនៃជំងឺនេះ ជាពិសេសយុទ្ធនាការចាក់វ៉ាក់សាំងជូនប្រជាពលរដ្ឋទូទាំងប្រទេស ដោយមិនរើសអើងពូជសាសន៍ សំដៅបន្តការពារ និងជួយសង្រ្គោះអាយុជីវិតប្រជាពលរដ្ឋ ពីជំងឺដ៏កាចសាហាវនេះ។ លើសពីនេះទៀត វីរភាពរបស់ សម្តេចតេជោនាយករដ្ឋមន្ត្រី មិនត្រឹមតែរុងរឿងថ្កើងថ្កាននៅក្នុងប្រទេសប៉ុណ្ណោះទេ ប៉ុន្តែថែមទាំងនៅលើឆាកអន្តរជាតិទៀតផង ដែលធ្វើឱ្យព្រះរាជាណាចក្រកម្ពុជាបន្តទទួលបាននូវកិត្យានុភាព និងឧត្តមភាពល្បីរន្ទឺទូទាំងសកលលោក។

ឆ្លៀតក្នុងឱកាសដ៏មហាប្រសើរថ្លៃថ្លានេះ យើងខ្ញុំទាំងអស់គ្នា សូមលើកហត្ថបួងសួងដល់គុណបុណ្យព្រះរតនត្រ័យ កែវទាំងបី វត្ថុស័ក្តិសិទ្ធិទាំងឡាយក្នុងលោក ទេវតារក្សាព្រះរាជាណាចក្រកម្ពុជា សូមជួយប្រោះព្រំសព្ទសាធុការពរជ័យ បវរសួស្តី សិរីមង្គល វិបុលសុខមហាប្រសើរជូន សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ព្រមទាំងបុត្រា បុត្រី ចៅប្រុស ចៅស្រី ជាទីស្រឡាញ់ទាំងអស់ សូមជួបប្រទះតែសេចក្តីសុខ សុភមង្គល ព្រមទាំងសមប្រកបដោយព្រះពុទ្ធពរទាំងបួនប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

សូម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា មេត្តាទទួលនូវគារវកិច្ចដ៏ខ្ពង់ខ្ពស់ និងភក្តីភាពដ៏ស្មោះស្ម័គ្របំផុត ពីយើងខ្ញុំទាំងអស់គ្នា។

ថ្ងៃអង្គារ ១០រោច ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥

រាជធានីភ្នំពេញ ថ្ងៃទី៣ ខែសីហា ឆ្នាំ២០២១

រដ្ឋមន្ត្រីក្រសួងពាណិជ្ជកម្ម

ឯកឧត្តម ប៉ាន សូរស័ក្ដិ

ព័ត៌មានថ្មីៗ

សេចក្ដីជូនដំណឹងស្ដីពី៖ ការលក់ផលិតផលខ្មែរក្រោមកម្មវិធីស្ដីពីកិច្ចសហការជំរុញ និងបង្កើនការលក់ផលិតផលខ្មែរនៅស្ថានីយប្រេងឥន្ធនៈភីធីធីតាម បណ្តារាជធានី-ខេត្ត ដំណាក់កាលទី២ ត្រីមាសទី៣ ឆ្នាំ២០២៣

ថ្ងៃទី០៤ ខែកញ្ញា ឆ្នាំ២០២៣ ម៉ោង ០៣:១៥ នាទី យប់

សេចក្តីជូនដំណឹងស្ដីពី៖ តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី ១ ដល់ថ្ងៃទី ១០ ខែកញ្ញា ឆ្នាំ២០២៣

ថ្ងៃទី០១ ខែកញ្ញា ឆ្នាំ២០២៣ ម៉ោង ០៣:០៧ នាទី រសៀល

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ទទួលជួបសម្តែងការគួរសមជាមួយឯកឧត្តម Francisco Kalbuadi Lay ឧបនាយករដ្ឋមន្ត្រី រដ្ឋមន្ត្រីសម្របសម្រួលកិច្ចការសេដ្ឋកិច្ច និងជារដ្ឋមន្ត្រីក្រសួងទេសចរណ៍ និងបរិស្ថាន នៃប្រទេសទីម័រខាងកើត

ថ្ងៃទី២៨ ខែសីហា ឆ្នាំ២០២៣ ម៉ោង ០៧:៣៥ នាទី យប់

ព័ត៌មានថ្មីៗ

ស្លាក