កិច្ចប្រជុំក្រុមការងារពិធីការ និងបដិសណ្ឋារកិច្ច សម្រាប់ត្រៀមរៀបចំវេទិកា “សេដ្ឋកិច្ច និងធុរកិច្ចអាស៊ី-អឺរ៉ុប លើកទី១” នៅកំឡុងពេលនៃកិច្ចប្រជុំកំពូលអាស៊ី-អឺរ៉ុបលើកទី១៣ នៅកម្ពុជា

(ភ្នំពេញ)៖ នារសៀលថ្ងៃទី៣០ ខែធ្នូ ឆ្នាំ២០២០ នៅទីស្តីការក្រសួងពាណិជ្ជកម្ម ឯកឧត្ដម ស៊ាង ថៃ រដ្ឋលេខាធិការក្រសួងពាណិជ្ជកម្ម បានដឹកនាំកិច្ចប្រជុំក្រុមការងារពិធីការ និងបដិសណ្ឋារកិច្ច សម្រាប់ត្រៀមរៀបចំវេទិកា “សេដ្ឋកិច្ច និងធុរកិច្ចអាស៊ី-អឺរ៉ុប លើកទី១” ក្នុងកំឡុងពេលនៃកិច្ចប្រជុំកំពូលអាស៊ី-អឺរ៉ុបលើកទី១៣ ដែលគ្រោងនឹងប្រព្រឹត្តទៅនាំដើមខែមិថុនា ឆ្នាំ២០២១ ខាងមុខ នៅរាជធានីភ្នំពេញ ដោយមានការចូលរួមពី ឯកឧត្តម លោកជំទាវអនុរដ្ឋលេខាធិការ អគ្គនាយក អគ្គនាយករង ប្រធាននាយកដ្ឋាន និងមន្រ្តីពាក់ព័ន្ធមួយចំនួនក្នុងក្រុមការងារនេះ។

ជាកិច្ចចាប់ផ្ដើម ឯកឧត្ដមរដ្ឋលេខាធិការ បានមានប្រសាសន៍ថា ប្រទេសកម្ពុជា ត្រូវទទួលធ្វើម្ចាស់ផ្ទះរៀបចំកិច្ចប្រជុំកំពូលអាស៊ី-អឺរ៉ុបលើកទី១៣ ដែលគ្រោងនឹងប្រព្រឹត្តទៅនាដើមខែមិថុនា ឆ្នាំ២០២១ ខាងមុខ នៅរាជធានីភ្នំពេញ ហើយក្រសួងពាណិជ្ជកម្ម ត្រូវទទួលភារកិច្ចរៀបចំវេទិកា សេដ្ឋកិច្ច និងធុរកិច្ចអាស៊ី-អឺរ៉ុបលើកទី១ ដែលគ្រោងនឹងរៀបចំមួយថ្ងៃមុនពិធីបើកកិច្ចប្រជុំកំពូលអាស៊ី-អឺរ៉ុប ជាផ្លូវការ។

ឯកឧត្ដមរដ្ឋលេខាធិការបានសង្កត់ធ្ងន់ថា វេទិកានេះ មានសារៈសំខាន់ណាស់ ព្រោះនឹងមានថ្នាក់ដឹកនាំធុរកិច្ចល្បីៗ ដឹកនាំប្រតិភូពាណិជ្ជកម្ម និងវិនិយោគធំៗ មកពីទ្វីបអាស៊ី និងអឺរ៉ុបមកចូលរួមដើម្បីស្វែងរកកាលានុវត្តន៍ភាពកសាងទំនាក់ទំនងសេដ្ឋកិច្ច និងវិនិយោគទៅវិញទៅមក។ ហេតុនេះដើម្បីត្រៀមលក្ខណៈទទួលរៀបចំវេទិកាសេដ្ឋកិច្ច និងធុរកិច្ចអាស៊ី-អឺរ៉ុបលើកទី១ ឲ្យទទួលបានជោគជ័យនិងលទ្ធផលល្អ ក្រសួងពាណិជ្ជកម្ម បានធ្វើការបែងចែកភារកិច្ចទទួលខុសត្រូវជូន ក្រុមការងារតូចៗ ដូចជា ក្រុមការងារកសាងឯកសារ ក្រុមការងារពិធីការ និងបដិសណ្ឋារកិច្ច ជាដើម ដោយក្នុងក្រុមនីមួយៗ នឹងមានរៀបចំក្រុមការងារតូចៗ ដើម្បីទទួលខុសត្រូវការងារលំអិតផ្សេងៗទៀតដូចជា ក្រុមការងារពិធីការ រៀបចំកន្លែងប្រជុំ ដឹកជញ្ជូន សិល្បៈ សន្តិសុខ និងក្រុមតាំងបង្ហាញផលិតផលសក្កានុពលរបស់កម្ពុជា ជាដើម។

ឯកឧត្ដមរដ្ឋលេខាធិការ បានស្នើដល់ក្រុមតូចៗទាំងអស់យកចិត្តទុកដាក់រៀបចំផែនការការងារ របស់ខ្លួនឲ្យបានល្អិតល្អន់ ត្រូវតាមដាន និងរាយការណ៍ពីវឌ្ឍនភាពការងារដែលក្រុមការងារនីមួយៗបានបំពេញ ធ្វើដូច្នេះ ទើបអាចគ្រប់គ្រងការរៀបចំព្រឹត្តិការណ៍បានគ្រប់ជ្រុងជ្រោយ និងទទួលបានលទ្ធផលល្អប្រសើរ៕