ឯកឧត្តម កឹម ស៊ីថន ដឹកនាំមន្ត្រីរាជការ​ក្រសួង​ពាណិជ្ជកម្ម គោរពវិញ្ញាណក្ខន្ធព្រះសព សម្តេចរាជបុត្រីព្រះរៀម នរោត្តម បុប្ផាទេវី

(ភ្នំពេញ)៖ នៅរសៀលថ្ងៃទី២២ ខែវិច្ឆិកា ឆ្នាំ២០១៩នេះ ឯកឧត្តម កឹម ស៊ីថន រដ្ឋលេខាធិការប្រចាំការ តំណាងរបស់​ឯកឧត្តម ប៉ាន សូរស័ក្តិ រដ្ឋមន្ត្រី​ក្រសួង​ពាណិជ្ជកម្ម បានដឹកនាំមន្ត្រីរាជការ​ក្រោម​ឱវាទក្រសួង អញ្ជើញ​ទៅ​គោរពវិញ្ញាណក្ខន្ធព្រះសព សម្តេចរាជបុត្រីព្រះរៀម នរោត្តម បុប្ផាទេវី ឧត្តម​ប្រឹក្សា​ផ្ទាល់​ព្រះមហាក្សត្រ សមាជិកា​នៃ​ក្រុម​ប្រឹក្សាធម្មនុញ្ញ និង​ជាអតីត​រដ្ឋមន្ត្រី​ក្រសួង​វប្បធម៌ និង​វិចិត្រសិល្បៈ ដែល​បាន​សោយព្រះទីវង្គត កាលពី​វេលាម៉ោង ១២និង៣០នាទី ថ្ងៃទី១៨ ខែវិច្ឆិកា ឆ្នាំ២០១៩ ក្នុង​ព្រះជន្មាយុ ៧៧ព្រះវស្សា ដោយ​ព្រះ​រោគាពាធ។

ថ្នាក់ដឹកនាំ និង​មន្ត្រីរាជការក្រសួង​ មានសេចក្ដីរន្ធត់សង្វេគ​ក្នុងចិត្តយ៉ាងក្រៃលែង និងសោកស្តាយជាអនេក ព្រមទាំងសូម​ក្រាប​បង្គំ​ចូលរួម​រំលែក​នូវ​ព្រះរាជ​មរណ​ទុក្ខជាមួយ​សម្តេចព្រះមហាក្សត្រី ព្រះ​វរ​រាជ​មាតា​ជាតិ​ខ្មែរ ព្រះ​ករុណា​ជា​អម្ចាស់​ជីវិត​លើត្បូង ជាទីគោរព​សក្ការៈ​ដ៏ខ្ពង់​ខ្ពស់​បំផុត និង​ព្រះញាតិវង្សានុវង្ស ចំពោះ​ការ​សោយ​ព្រះទីវង្គត​របស់សម្តេចរាជបុត្រីព្រះរៀម នរោត្តម បុប្ផាទេវី។

ជាមួយគ្នា​នេះដែរ ថ្នាក់ដឹកនាំ និង​មន្ត្រីរាជការក្រសួង​ពាណិជ្ជកម្ម ចាត់ទុកថា ការ​សោយ​ព្រះទីវង្គតរបស់​សម្តេចរាជបុត្រីព្រះរៀម នរោត្តម បុប្ផាទេវី គឺជាការបាត់បង់នូវឥស្សរជនខ្មែរដ៏ឆ្នើមមួយព្រះអង្គ ដែលបានលះបង់ព្រះបញ្ញាញាណ និងព្រះកាយពល ពេញមួយព្រះជន្មរបស់សម្តេច ដើម្បីបុព្វហេតុជាតិមាតុភូមិ និងប្រជានុរាស្រ្ត តាមរយៈស្នាព្រះហត្ថដ៏ឧត្តុង្គ​ឧត្តម​ថ្លៃ​ថ្លាតាំង​ពីសម័យ​សង្គម​រាស្រ្ត​និយម ក្នុងការការពារ ថែរក្សា និងអភិវឌ្ឍន៍ សិល្បៈ វប្បធម៌ ប្រពៃណីជាតិឱ្យ​ថ្កើន​ថ្កាន​ល្បីល្បាញ​ពាស​ពេញ​ពិភពលោក រហូត​ទទួល​បាន​ព្រះ​គោរមងារ​ជា “ទេពនាថវដ្តីឯក”។

ទន្ទឹម​នេះ ថ្នាក់ដឹកនាំ និង​មន្ត្រីរាជការក្រសួង​ពាណិជ្ជកម្ម សូមក្រាប​បង្គំ សូមវន្ទាឧទ្ទិសដល់ដួងព្រះវិញ្ញាណក្ខន្ធ​របស់​សម្តេចរាជបុត្រី ព្រះរៀម នរោត្តម បុប្ផាទេវី សូមបាន​យាងក្នុងឋាន​ព្រះបរមសុខ​ជានិច្ច​និរន្តរ៍តរៀងទៅ។