ឯកឧត្ដម ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្ម ដឹកនាំកិច្ចប្រជុំអន្តរក្រសួង ពិនិត្យបញ្ចប់សេចក្ដីព្រាង កិច្ចព្រមព្រៀង ស្ដីពីកិច្ចសហប្រតិបត្តិការសេដ្ឋកិច្ចពាណិជ្ជកម្ម និងបច្ចេកទេសរវាងកម្ពុជា និងកាតា

(ភំ្នពេញ)៖ នារសៀលថ្ងៃទី១៦ ខែមីនា ឆ្នាំ២០២២ នៅទីស្តីការក្រសួងពាណិជ្ជកម្ម ឯកឧត្ដម ប៉ែន សុវិជាតិ អនុរដ្ឋលេខាធិការ និងជាអ្នកនាំពាក្យក្រសួងពាណិជ្ជកម្ម បានដឹកនាំកិច្ចប្រជុំអន្តរក្រសួងដើម្បីពិភាក្សាលើខ្លឹមសារ និងពន្លឿនបញ្ចប់សេចក្ដីព្រាងនៃកិច្ចព្រមព្រៀងស្ដីពីកិច្ចសហប្រតិបត្តិការសេដ្ឋកិច្ចពាណិជ្ជកម្ម និងបច្ចេកទេសរវាងកម្ពុជា-កាតា ដែលមានការអញ្ជើញចូលរួមពីតំណាងក្រសួង-ស្ថាប័នពាក់ព័ន្ធសរុបចំនួន ១២ស្ថាប័ន។

ឯកឧត្ដមអនុរដ្ឋលេខាធិការ លើកឡើងថា ដោយបានឆ្លងកាត់ការចរចា និងការត្រួតពិនិត្យកម្រិតអន្តរក្រសួង ព្រមទាំងកម្រិតបច្ចេកទេសទ្វេភាគីជាច្រើនដងរួចមក ក្នុងគោលបំណងទាញអត្ថប្រយោជន៍ជាអតិបរមាសម្រាប់កិច្ចសហប្រតិបត្តិការទ្វេភាគីកាន់តែស៊ីជម្រៅនាពេលខាងមុខ ភាគីទាំងពីរបានឯកភាពស្ទើរតែទាំងស្រុងលើខ្លឹមសារនៃសេចក្តីព្រាងនៃកិច្ចព្រមព្រៀងនេះ ហើយអាចពន្លឿនបញ្ចប់សេចក្ដីព្រាងនៃកិច្ចព្រមព្រៀងខាងលើ ដើម្បីអាចឈានដល់ការចុះហត្ថលេខា នាពេលវេលាសមស្របខាងមុខ។

ឯកឧត្ដមអនុរដ្ឋលេខាធិការ បញ្ជាក់ថា សេចក្តីព្រាងនៃកិច្ចព្រមព្រៀងស្តីពីកិច្ចសហប្រតិបត្តិការសេដ្ឋកិច្ចពាណិជ្ជកម្ម និងបច្ចេកទេសរវាងកម្ពុជា និងកាតា បានបញ្ចូលកិច្ចសហប្រតិបត្តិការលើវិស័យអាទិភាពសំខាន់ៗជាច្រើន រួមមាន៖ វិស័យពាណិជ្ជកម្ម, ពន្ធគយ, វិនិយោគ, ឧស្សាហកម្ម, កសិកម្ម, ទូរគមនាគមន៍, រ៉ែ និងថាមពល, វិទ្យាសាស្រ្ត, ទេសចរណ៍, ការដឹកជញ្ជូន។-ល-។ កិច្ចព្រមព្រៀងនេះនឹងផ្តល់នូវមូលដ្ឋានគតិយុត្តជាសារវ័ន្ត សម្រាប់កាលានុវត្តភាពនៃកិច្ចសហប្រតិបត្តិការគ្រប់ជ្រុងជ្រោយរវាងកម្ពុជា និងកាតា នាពេលអនាគត សំដៅបង្កើនទំហំពាណិជ្ជកម្ម និងវិនិយោគទ្វេភាគីឱ្យកាន់តែប្រសើរថែមមួយកម្រិតទៀត៕