ឯកឧត្តម ប៉ាន សូរស័ក្តិ អញ្ជើញដាក់សម្ពោធឱ្យប្រើប្រាស់​ជា​ផ្លូវការ​នូវអគារទីស្នាក់ការថ្មី សាខាការពារអ្នកប្រើប្រាស់ កិច្ចការប្រកួតប្រជែង និង​បង្រ្កាប​ការក្លែងបន្លំ ខេត្តរតនគីរី

(រតនគីរី)៖ កាលពីព្រឹកថ្ងៃទី២៦ ខែមីនា ឆ្នាំ២០២២ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បាន​អញ្ជើញ​ដាក់​សម្ពោធឱ្យប្រើប្រាស់​ជា​ផ្លូវការ​នូវអគារទីស្នាក់ការថ្មី សាខាការពារអ្នកប្រើប្រាស់ កិច្ចការប្រកួតប្រជែង និង​បង្រ្កាប​ការក្លែងបន្លំ (ក.ប.ប.) ខេត្តរតនគីរី ដែលមានទីតាំងស្ថិតនៅ ភូមិ ៧មករា សង្កាត់ឡាបានសៀក ក្រុងបានលុង ខេត្តរតនគិរី ដើម្បីបង្កភាពងាយស្រួលដល់ការបំពេញការងាររបស់មន្ត្រី និងផ្តល់សេវាជូនប្រជាពលរដ្ឋ។

ពិធីនេះ ក៏មានការអញ្ជើញចូលរួមពី ឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរី ឯកឧត្តម ផាន អូន ប្រតិភូរាជរដ្ឋាភិបាលកម្ពុជា ទទួកបន្ទុកជាអគ្គនាយក នៃនាយកដ្ឋាន ក.ប.ប. ព្រមទាំងថ្នាក់ដឹកនាំ និងមន្ត្រីក្រសួង-មន្ទីរពាណិជ្ជកម្ម ព្រមទាំងសាខា ក.ប.ប. ជាច្រើនរូប។

ក្នុងអង្គពិធី ឯកឧត្តមប្រតិភូរាជរដ្ឋាភិបាលកម្ពុជា ទទួកបន្ទុកជាអគ្គនាយក នៃនាយកដ្ឋាន ក.ប.ប. បានរាយការណ៍ជូន​អំពីសាវតា នៃការក៏សាងអគារទីស្នាក់ការថ្មីនេះ រួមទាំងកិច្ចខំប្រឹងប្រែង និង​លទ្ធផល​ការងារ​ដែល​សាខា ក.ប.ប. ខេត្តរតនគីរី សម្រេចបាន។ ឯកឧត្តមអគ្គនាយកបន្តថា រហូតមកដល់ពេលបច្ចុប្បន្ន អាគារស្នាក់ការនៃសាខា ក.ប.ប. នៅតាមបណ្តាខេត្តមានចំនួន ១៣ ត្រូវបានសាងសង់ រួមមានខេត្តព្រះសីហនុ តាកែវ បន្ទាយមាជ័យ ស្វាយរៀង កំពត កំពង់ចាម ព្រះវិហារ ត្បូងឃ្មុំ ព្រៃវែង បាត់ដំបង រតនគិរី និងមាន ២ ខេត្តទៀត គឺខេត្តមណ្ឌលគិរី ត្រៀមដាក់សម្ពោធ ឱ្យប្រើប្រាស់ជាផ្លូវការនាថ្ងៃទី២៨ ខែមីនា ឆ្នាំ២០២២ និងខេត្តកោះកុង នឹងត្រៀមសម្ពោធដាក់ឱ្យប្រើប្រាស់ជា   ផ្លូវការនាពេលឆាប់ៗខាងមុខ។

ជាមួយគ្នានេះ ឯកឧត្តមអភិបាល​នៃគណៈអភិបាលខេត្តរតនគិរី ក៏បានជម្រាបជូនអំពីកត្តាភូមិសាស្រ្ត និង​សមិទ្ធិផល​ជាច្រើន​ដែលខេត្តសម្រេចបាន ព្រមទាំងសក្កដានុពល​របស់ខេត្តទាំងមូល ដូចជា ផ្នែកដំណាំកសិកម្ម និង​តំបន់​ទេសចរណ៍​ជាដើម។

ក្នុងឱកាសនោះ ឯកឧត្តមរដ្ឋមន្ត្រី បានសម្ដែងការ​អបអរសា​ទរ និងថ្លែងនូវការកោតសរសើរ​ចំពោះ​គណៈអភិបាលខេត្ត មន្ទីរ អង្គភាពពាក់ព័ន្ធ គណៈ​​កម្មការ​សាងសង់ ក្រុមហ៊ុនសាងសង់ មន្រ្តីសាខា ក.ប.ប. ខេត្តរតនគិរី ព្រមទាំង​អាជ្ញាធរ​ពាក់ព័ន្ធ​ផ្សេងទៀត ដែលបានចូលរួមសហការយ៉ាងល្អ រហូតបានសម្រេចនូវសមិទ្ធផលជាទីគាប់ប្រសើរនេះ។

ឯកឧត្តមរដ្ឋមន្ត្រីបន្តថា អគារទីស្នាក់ការថ្មី​របស់សាខា ក.ប.ប.  នេះ គឺជា​សមាស​ភាគ​រួមផ្សំមួយនៃហេដ្ឋារចនាសម្ព័ន្ធរូបវន្តរបស់ខេត្ត ដែលបង្ហាញពីការរីកចម្រើនជាបន្តបន្ទាប់របស់ខេត្ត ស្របពេល ដែលវិស័យដ៏ទៃទៀតកំពុងបោះជំហានទៅរកការអភិវឌ្ឍជាលំដាប់។ ជាពិសេស វានឹងក្លាយជាតួអង្គសំខាន់ក្នុងការបង្ខិតសេវាសាធារណៈឱ្យកាន់តែជិតប្រជាពលរដ្ឋ និងកាន់តែងាយស្រួលផងដែរ។

ឆ្លៀតក្នុងឱកាសនោះឯកឧត្តមរដ្ឋមន្ត្រី បានផ្ដល់នូវអនុសាសន៍ណែនាំមួយចំនួនដល់មន្រ្តីមន្ទីរពាណិជ្ជកម្ម និង​សាខា ក.ប.ប ដូចមានខាងក្រោម៖

ទី១- មន្រ្តីរាជការមន្ទីរពាណិជ្ជកម្ម និងសាខា ក.ប.ប. ត្រូវបន្តខិតខំយក​ចិត្តទុកដាក់​ក្នុង​ការពង្រីក​​​ចំណេះ​ដឹងខ្លួនបន្ថែមទៀត ទាំងកម្រិតជំនាញ និងភាសាបរទេស ជាពិសេសរួម​សហការគ្នា​ចុះ​ត្រួត​ពិនិត្យ​​ទំនិញ​ដែលខូចគុណភាព ដើម្បីការពារសុខភាពរបស់ប្រជាពលរដ្ឋ ក៏ដូចជា​ការពារសុខភាពបងប្អូន កូនចៅរបស់ខ្លួនឯងដែរ។

ទី២- ត្រូវប្រើប្រាស់មន្រ្តីឱ្យអស់លទ្ធភាព និងបណ្តុះបណ្តាលមន្រ្តីដែលមានស្រាប់ទៅតាមជំនាញ

ទី៣- មន្ត្រីរាជការមន្ទីរពាណិជ្ជកម្ម និងសាខា ក.ប.ប. ត្រូវបន្តធ្វើសហប្រតិបត្តិការ​ឱ្យកាន់តែ​ជិតស្និទ្ធ​ជាមួយអាជ្ញាធរមូលដ្ឋាន ដើម្បីចូលរួមផ្សព្វផ្សាយ​ឱ្យបានទូលំទូលាយ​នូវកម្មវិធីកែ​ទម្រង់​ស៊ីជម្រៅ​របស់​រាជរដ្ឋាភិបាល ជាពិសេសកំណែទម្រង់ស៊ីជម្រៅរបស់ក្រសួងពាណិជ្ជកម្ម ក្នុងការដាក់ចេញ​គោលនយោបាយ​​ពាណិជ្ជកម្ម សំដៅជួយសម្រួលពាណិជ្ជកម្ម ក្នុងការនាំចេញ និងសម្រួលដល់ការផ្តល់​សេវា​សាធារណៈជូនប្រជាពលរដ្ឋ។

ទី៤- បញ្ចៀសដាច់ខាតការទាមទារកម្រៃសេវាក្រៅផ្លូវការពីអាជីករ ពាណិជ្ជករ ផលិតករ អ្នកនាំចេញ និងសេវាផេ្សងៗ ដែលផ្ទុយពីខ្លឹមសារប្រកាសរួមស្តីពី​កម្រងសេវា​សាធារណៈ​រវាង​ក្រសួង​ពាណិជ្ជកម្ម និង​ក្រសួងសេដ្ឋកិច្ច និងហិរញ្ញវត្ថុ។

ទី៥- ត្រូវបន្តជំរុញ​ពង្រឹងបន្ថែម​យន្តការតាមដាន និងត្រួតពិនិត្យការគ្រប់គ្រងអាជីវកម្ម សេវាកម្ម ពាណិជ្ជកម្ម ថ្លៃទំនិញ និងសន្និធិទំនិញចាំបាច់ ស្រូវ-អង្ករ​ ប្រេងឥន្ធនៈ និងការ​ធ្វើ​ពាណិជ្ជកម្មទំនិញ​នៅ​តាម​ព្រំដែន ដោយ​ប្រើប្រាស់ប្រព័ន្ធ​បច្ចេកវិទ្យាព័ត៌មាន​ និងជំរុញ​យន្តការដោះស្រាយបញ្ហាដល់កសិករ  ផលិតករ ដោយ​ផ្តោត​លើ​ផលិតផល​សក្តានុពល​ចំនួន ​៥មុខ មាន់ស្រែ​ បន្លែ ដំឡូង​ ស្រូ​វប្រណិត និង​សូត្រ ​ដោយ​បង្កើតផ្សារចុងសប្តាហ៍នៅតាម​បណ្តាខេត្ត​ទាំង ១៨ ព្រមទាំ​ងឧបត្ថម្ភទុន  ផ្តល់កម្ចី  និងកសាង​ហេដ្ឋា​រចនា​សម្ព័ន្ធ​គាំទ្រ​តាមរយៈគម្រោងជំរុញ​ទីផ្សារសម្រាប់​កសិកម្មខ្នាតតូច​ (AIMS) ដែល​អនុវត្ត​ដោយ​ក្រសួង​​ពាណិជ្ជកម្ម។

ទី៦- ​ពេលចុះអនុវត្តន៍​ការងារក្នុងពេលប្រយុទ្ធប្រឆាំងនឹងជំងឺកូវីដ-១៩ នាពេលនេះ និងដើម្បីរក្សា  គម្លាតសង្គម ឯកឧត្តម លោក លោកស្រី មន្រ្តីរាជការយើងទាំងអស់ ត្រូវប្រុងប្រយ័ត្ន និងត្រូវអនុវត្តឱ្យ​បាន​ត្រឹមត្រូវតាមការណែនាំរបស់ក្រសួងសុខាភិបាល៕