ក្រុមហ៊ុនអចលនទ្រព្យអាម៉េរិក សម្លឹងឃើញកម្ពុជាជាទីផ្សារសក្តានុពលខ្ពស់ ក្នុងចំណោមប្រទេសអាស៊ី

(ភ្នំពេញ)៖ នាព្រឹកថ្ងៃទី១២ ខែកញ្ញា ឆ្នាំ២០២២ ឯកឧត្តម មាស សេង ទីប្រឹក្សាក្រសួងពាណិជ្ជកម្ម និងជាតំណាង ឯកឧត្តម ប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្ម បានជួបពិភាក្សាការងារជាមួយគណៈប្រតិភូ ក្រុមហ៊ុន Double Door ដែលមានមូលដ្ឋាននៅសហរដ្ឋអាម៉េរិក ដឹកនាំដោយលោកស្រី Amy Kwan ស្ថាបនិករបស់ក្រុមហ៊ុន ក្រោមកិច្ចសម្របសម្រួលរបស់ឯកឧត្តម ហួត គីមឆា អគ្គកុងស៊ុលកិត្តិយសនៃស្ថានទូតកម្ពុជា ប្រចាំទីក្រុង Long Beach សហរដ្ឋអាម៉េរិក ដើម្បីទទួលបាននូវបច្ចុប្បន្នភាពព័ត៌មានទាក់ទងនឹងវិស័យពាណិជ្ជកម្ម និងការវិនិយោគក្នុងវិស័យអចលនទ្រព្យ នៅកម្ពុជា។

លោកស្រី Amy Kwan បានសំដែងការចាប់អាម្មណ៍យ៉ាងខ្លាំងចំពោះវិស័យអចលនទ្រព្យនៅកម្ពុជា ដោយសារសម្លឹងឃើញសក្តានុពល និងកាលានុវត្តភាពខ្ពស់ ពិសេសគឺការប្រើប្រាស់វិស័យបច្ចេកវិទ្យាសម្រាប់ដោះស្រាយបញ្ហានានាក្នុងវិស័យអចលនទ្រព្យ។ លោកស្រីបានលើកឡើងថា កម្ពុជាគឺជាប្រទេសទី១ ដែលលោកស្រីបានជ្រើសរើសធ្វើដំណើរទស្សនកិច្ច ក្នុងចំណោមប្រទេសនានានៅទ្វីបអាស៊ី ដោយសារកម្ពុជាជាប្រទេសដែលមានភាពទាក់ទាញខ្លាំង ហើយប្រទេសពីរទៀតគឺ វៀតណាម និងឥណ្ឌា។ លោកស្រីបានមានប្រសាសន៍ថា ខេត្តនៅកម្ពុជាដែលគួរឲ្យចាប់អារម្មណ៍ជាងគេ ហើយដែលលោកស្រីបានធ្វើទស្សនៈកិច្ចរួចរាល់ហើយនោះ គឺរាជធានីភ្នំពេញ ខេត្តកំពត ខេត្តព្រះសីហនុ ខេត្តបន្ទាយមានជ័យ និងខេត្តសៀមរាប។ លោកស្រីបានសម្លឹងឃើញថា ទីផ្សារអចលនទ្រព្យនៅសហរដ្ឋអាម៉េរិក ហាក់មានសភាពជាប់គាំង ជាហេតុធ្វើឲ្យពលរដ្ឋអាម៉េរិកជាច្រើន កំពុងសម្លឹងរកកាលានុវត្តភាពវិនិយោគក្នុងវិស័យអចលនទ្រព្យនៅក្រៅប្រទេស។ លោកស្រីមានឆន្ទៈរួមចំណែកក្នុងការកៀងគរអ្នកដែលមានលទ្ធភាពទិញអចលទ្រព្យ ពីសហរដ្ឋអាម៉េរិកមកកម្ពុជា ព្រមទាំងធ្វើឲ្យកម្ពុជាក្លាយជាទីផ្សារអចលនទ្រព្យដែលកាន់តែមានភាពទាក់ទាញសម្រាប់ពលរដ្ឋអាម៉េរិក។

ជាការឆ្លើយតប ឯកឧត្តម មាស សេង បានថ្លែងមតិស្វាគមន៍យ៉ាងកក់ក្តៅចំពោះវត្តមានរបស់លោកស្រី Amy Kwan ក៏ដូចជាក្រុមហ៊ុន Double Door នៅកម្ពុជា។ ឯកឧត្តម ក៏បានពន្យល់ និងផ្តល់ជាអនុសាសន៍ដល់លោកស្រី ពាក់ព័ន្ធនឹងការចាប់ផ្តើមអាជីវកម្មនៅកម្ពុជា ដោយបានចង្អុលបង្ហាញឲ្យលោកស្រីបានស្គាល់អំពីជនបង្គោល តួរអង្គសំខាន់ៗ និងស្ថាប័នពាក់ព័ន្ធនានា ដើម្បីស្នើសុំចុះបញ្ជីពាណិជ្ជកម្ម ចុះបញ្ជីពន្ធដារ ស្នើសុំអាជ្ញាប័ណ្ណអចលនវត្ថុ ព្រមទាំងស្វែងយល់ឲ្យកាន់តែលម្អិតបន្ថែមទៀត អំពីវិស័យអចលនទ្រព្យនៅកម្ពុជា។ ឯកឧត្តម ក៏បានបញ្ជាក់ជូនលោកស្រី ផងដែរថា ក្រសួងពាណិជ្ជកម្មកម្ពុជា តែងតែរៀបចំពិព័រណ៍ពាណិជ្ជកម្មនានាជាប្រចាំ ទាំងក្នុងនិងក្រៅប្រទេស ដើម្បីបង្ករលក្ខណៈងាយស្រួលដល់វិនិយោគិនជាតិ និងអន្តរជាតិ ក្នុងការចាប់ដៃគូរអាជីវកម្ម និងបង្កើតឲ្យមានកាលានុវត្តភាពក្នុងការវិនិយោគរួមគ្នា។

គួររលឹកផងដែរថា ក្រុមហ៊ុន Double Door ត្រូវបានបង្កើតឡើងនៅឆ្នាំ២០១៧ នៅសហរដ្ឋអាម៉េរិក ដែលជាក្រុមហ៊ុនឈានមុខគេក្នុងការប្រើប្រាស់បច្ចេកវិទ្យាក្នុងការដោះស្រាយបញ្ហានានាក្នុងវិស័យអចលនទ្រព្យ។ Double Door គឺជាក្រុមហ៊ុនដែលផ្តោតតែលើទីផ្សារអចលនទ្រព្យនៅក្រៅសហរដ្ឋអាម៉េរិក ដោយមិនផ្តោតលើអចលនទ្រព្យក្នុងទីផ្សារសហរដ្ឋអាម៉េរិកឡើយ៕