សេចក្ដីជូនដំណឹងស្ដីពី: រៀបចំពិព័រណ៍ផលិតផលខ្មែរ ក្នុង​ឱកាស​​ពិធីបុណ្យសមុទ្រ​លើកទី៩ ជុំទី៣ ឆ្នាំ២០២២ នៅក្រុងព្រះសីហនុ ខេត្តព្រះសីហនុ

ក្រសួងពាណិជ្ជកម្ម នៃព្រះរាជាណាចក្រកម្ពុជា មានកិត្តិយសសូមជម្រាបជូនដំណឹងដល់សាធារណជន​ទូទៅឱ្យ​បាន​​ជ្រាប​ថា​៖ ក្នុងយុទ្ធសាស្រ្តជួយជំរុញ និងលើកកម្ពស់ផលិតផលក្នុងស្រុកឱ្យមានការទទួលស្គាល់ និងចូលរួមប្រើប្រាស់​កាន់តែ​ទូលំទូលាយ​នៅទូទាំងប្រទេស ក្រសួងពាណិជ្ជកម្ម នឹងរៀបចំពិព័រណ៍ផលិតផលខ្មែរ ក្នុង​ឱកាស​​ពិធីបុណ្យសមុទ្រ​លើកទី៩ ជុំទី៣ ឆ្នាំ២០២២ ចាប់ពីថ្ងៃសុក្រ ១រោច ដល់ថ្ងៃអាទិត្យ ៣រោច ខែមិគសិរ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី៩ ដល់ថ្ងៃទី១១ ខែធ្នូ ឆ្នាំ២០២២ ក្រុងព្រះសីហនុ ខេត្តព្រះសីហនុ។​

ការរៀបចំព្រឹត្តិការណ៍ពាណិជ្ជកម្មនេះ ក្នុងគោលបំណងទូងស្គរពញ្ញាក់ស្មារតីមហាជនទូទៅ ឱ្យងាកមកចូលរួម​គាំទ្រ និងប្រើប្រាស់​ផលិតផល​​​ក្នុងស្រុកឱ្យ​បានច្រើនជាអតិបរិមា។ ក្រសួងពាណិជ្ជកម្ម នឹងប្រមូលកៀរគរផលិតផលខ្មែរ ដែលមាន​គុណ​ភាព​ខ្ពស់​​​ និងមាន​សុវត្ថិភាពសម្រាប់អ្នកប្រើប្រាស់ មានការវេចខ្ចប់បានល្អត្រឹមត្រូវអនុលោមតាម​ស្តង់ដារ​ផលិតកម្មពី​គ្រប់​ទិសទី​​នៅ​ទូទាំង​ប្រទេសមកដាក់តាំងបង្ហាញ និងស្វែងរកដៃគូពាណិជ្ជកម្ម។

​​អាស្រ័យដូចបានជម្រាបជូនខាងលើ ក្រសួងពាណិជ្ជកម្ម សូមអញ្ជើញ លោក-លោកស្រី ដែលមានបំណងចូលរួម​តាំងបង្ហាញ​ផលិតផលខ្មែរក្នុងព្រឹត្តិការណ៍នេះ សូមប្រញាប់រួសរាន់មកដាក់ពាក្យចូលរួម ព្រោះចំនួនស្តង់មានកំណត់។ ជាមួយ​គ្នា​នេះ ក្រសួងពាណិជ្ជកម្ម សូមអញ្ជើញសាធារណជនទូទៅចូលរួមទស្សនា និងគាំទ្រព្រឹត្តិការណ៍ដ៏មាន​សារៈ​សំខាន់​​នេះកុំបី​ខកខានឡើយ។

​សម្រាប់ព័ត៌មានបន្ថែម សូមទាក់ទងនាយកដ្ឋានកិច្ចការពិព័រណ៍ នៃអគ្គនាយកដ្ឋានជំរុញពាណិជ្ជកម្ម ដែលមាន​ទីតាំង​ស្ថិតនៅជាន់ទីពីរនៃអគារ​ទីស្តី​ការ​ក្រសួងពាណិជ្ជកម្ម អាសយដ្ឋាន៖ ដីឡូត៍ លេខ១៩-៦១ មហាវិថីសហព័ន្ធរុស្ស៊ី ភូមិទឹកថ្លា សង្កាត់ទឹកថ្លា ខណ្ឌ​សែន​សុខ​ រាជធានីភ្នំពេញ។

​ទំនាក់ទំនងទូរស័ព្ទលេខ៖​០៩៨ ៨១៨ ១៤៨/ ០៧៧​​ ៣៣៩​ ៤៣៩/ ០១៥ ៥៥៣ ៣៥៥ ​អាសយដ្ឋានអ៊ីម៉ែល៖ neary86@gmail.com ឬ rithyco@yahoo.com។ សូមអរគុណ !