លោកជំទាវ តឹករ៉េត កំរង អញ្ជើញជាអធិបតីភាពក្នុងកិច្ចប្រជុំគណៈកម្មការតាមដានការអនុវត្តគម្រោងយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក និងតម្រង់ទិសគម្រោងអភិវឌ្ឍន៍ពាណិជ្ជកម្មតាមប្រព័ន្ធអេឡិចត្រូនិកកម្ពុជា (Go4eCAM)

(ភ្នំពេញ)៖ កាលពីព្រឹកថ្ងៃទី២៨ ខែវិចិ្ឆកា ឆ្នាំ២០២២ លោកជំទាវ តឹករ៉េត កំរង រដ្ឋលេខាធិការក្រសួងពាណិជ្ជកម្ម ជាតំណាងដ៏ខ្ពង់ខ្ពស់ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានដឹកនាំកិច្ចប្រជុំគណៈកម្មការតាមដានការអនុវត្តគម្រោងយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក និងតម្រង់ទិសគម្រោងអភិវឌ្ឍន៍ពាណិជ្ជកម្មតាមប្រព័ន្ធអេឡិចត្រូនិកកម្ពុជា (Go4eCAM) ដែលមានការចូលរួមពីថ្នាក់ដឹកនាំក្រសួងពាណិជ្ជកម្ម តំណាងក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និងវិស័យឯកជនប្រមាណជា ៧០ នាក់។ កិច្ចប្រជុំគណៈកម្មការតាមដាននេះមានគោលបំណងដើម្បីរាយការណ៍ ពិនិត្យមើលវឌ្ឍនៈភាពការងារ និងអនុម័តលើសកម្មភាពអាទិភាពរហូតដល់ ខែសីហា ឆ្នាំ២០២៣ ក្រោមគម្រោង Go4eCAM ក្រោយពីនាយកដ្ឋានសហប្រតិបត្តិការអន្តរជាតិបានធ្វើបទបង្ហាញ។ កិច្ចប្រជុំនេះ ក៏ពិនិត្យ និងអនុម័តលើសកម្មភាពអាទិភាពសម្រាប់ឆ្នាំ២០២៣ ក្រោយពីមានការចូលរួមយ៉ាងសកម្មពីសំណាក់តំណាងក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និងវិស័យឯកជន។

លោកជំទាវរដ្ឋលេខាធិការ បានថ្លែងអំណរគុណដល់តំណាងក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និងវិស័យឯកជន ដែលបានចូលរួមកិច្ចប្រជុំគណៈកម្មការតាមដាននេះ និងសម្រាប់កិច្ចសហប្រតិបត្តិការល្អជាមួយក្រសួងពាណិជ្ជកម្មកន្លងមកទាក់ទងនឹងពាណិជ្ជកម្មតាមប្រព័ន្ធអេឡិចត្រូនិក។ នៅក្នុងបរិបទបដិវដ្តឧស្សាហកម្ម៤.០ បច្ចេកវិទ្យាឌីជីថលគឺជាគន្លឹះដ៏សំខាន់ក្នុងការជំរុញភាពប្រកួតប្រជែងរបស់សហគ្រាសពាណិជ្ជកម្ម និងដំណើរការអាជីវកម្ម ដែលរួមចំណែកដល់ការលើកកម្ពស់ផលិតភាព បង្កើនការនាំចេញ បង្កើតការងារ និងជំរុញកំណើនសេដ្ឋកិច្ចជាតិ។ ការអភិវឌ្ឍបច្ចេកវិទ្យាឌីជីថល ក៏ជាការឆ្លើយតបទៅនឹងគោលនយោបាយអភិវឌ្ឍន៍ឧស្សាហកម្មកម្ពុជា ក្របខណ្ឌយុទ្ធសាស្រ្តសេដ្ឋកិច្ច និងសង្គមឌីជីថល ២០២១-២០៣៥ និងក្របខណ្ឌយុទ្ធសាស្រ្តនិងកម្មវិធីស្តារ និងជំរុញកំណើនសេដ្ឋកិច្ចកម្ពុជាក្នុងការរស់នៅជាមួយកូវីដ១៩តាមគន្លងប្រក្រតីភាពថ្មីសម្រាប់ឆ្នាំ២០២១-២០២៣ តាមរយៈការជំរុញការប្រើប្រាស់បច្ចេកវិទ្យាឌីជីថលក្នុងការលើកកម្ពស់សមត្ថភាពភាពធន់ និងភាពប្រកួតប្រជែងរបស់សហគ្រាសធុនតូច និងមធ្យមក្នុងស្រុកឲ្យផ្សារភ្ជាប់ទៅនឹងខ្សែច្រវ៉ាក់តម្លៃតំបន់ និងសកលលោក៕