សេចក្តីជូនដំណឹងស្តីពី៖វគ្គបណ្តុះបណ្តាលត្រៀមប្រឡង និងការប្រឡងសមត្ថភាពដើម្បីក្លាយជាភ្នាក់ងារតំណាងស្របច្បាប់នៃម្ចាស់ម៉ាកក្នុងព្រះរាជាណាចក្រកម្ពុជា

យោងៈ    

-ព្រះរាជក្រមលេខ នស/រកម/០២០២/០០៦ ចុះថ្ងៃទី០៧ ខែកុម្ភៈ ឆ្នាំ ២០០២ ដែលប្រកាសឱ្យប្រើប្រាស់ច្បាប់ស្តីពី ម៉ាក ពាណិជ្ជនាម និងអំពើនៃការប្រកួតប្រជែងមិនស្មោះត្រង់  

-ប្រកាសលេខ ០៤៥ MOC/SM 2011 ចុះថ្ងៃទី០៩ ខែកុម្ភៈ ឆ្នាំ ២០១១ ស្តីពីភ្នាក់ងារតំណាងស្របច្បាប់ នៃម្ចាស់ម៉ាកក្នុងព្រះរាជាណាចក្រកម្ពុជា។

ក្រសួងពាណិជ្ជកម្ម សូមជម្រាបជូនដំណឹងដល់សាធារណជន ឱ្យបានជ្រាបថា ក្រសួងនឹងបើកវគ្គបណ្តុះបណ្តាលត្រៀមប្រឡង និងធ្វើការប្រឡងសមត្ថភាពដើម្បីក្លាយជាភ្នាក់ងារតំណាងស្របច្បាប់នៃម្ចាស់ម៉ាកក្នុង ព្រះរាជាណាចក្រកម្ពុជា ដែលមានលក្ខខណ្ឌដូចខាងក្រោម៖

ក. លក្ខខណ្ឌនៃការចុះឈ្មោះចូលរួមក្នុងវគ្គបណ្តុះបណ្តាលត្រៀមប្រឡង

ដើម្បីមានសិទ្ធិចុះឈ្មោះចូលរួមក្នុងវគ្គបណ្តុះបណ្តាលត្រៀមប្រឡង បេក្ខជនទាំងពីរភេទត្រូវ៖

- មានសញ្ជាតិខ្មែរ

- មានសញ្ញាបត្រយ៉ាងហោចណាស់បរិញ្ញាបត្រ ឬសញ្ញាបត្រដែលសមមូល

- មាននិវេសនដ្ឋានអចិន្ត្រៃយ៍នៅក្នុងព្រះរាជាណាចក្រកម្ពុជា និង/ឬ

- មានទីតាំងប្រកបអាជីវកម្ម ឬការងារនៅក្នុងព្រះរាជាណាចក្រកម្ពុជា។

ខ. លក្ខខណ្ឌនៃការចុះឈ្មោះប្រឡង

បេក្ខជនដែលដាក់ពាក្យសុំចុះឈ្មោះប្រឡង ត្រូវឆ្លងកាត់វគ្គបណ្តុះបណ្តាលត្រៀមប្រឡងឱ្យបានយ៉ាងតិច ចំនួន ៦៤ ម៉ោង។

គ. កាលបរិច្ឆេទទទួលពាក្យ និងទីកន្លែងទទួលពាក្យសុំចុះឈ្មោះចូលរួមវគ្គបណ្តុះបណ្តាល ត្រៀមប្រឡង

កាលបរិច្ឆេទទទួលពាក្យស្នើសុំចុះឈ្មោះចូលរួមវគ្គបណ្តុះបណ្តាលត្រៀមប្រឡង ចាប់ពីថ្ងៃជូនដំណឹងរហូត ដល់ថ្ងៃទី០៣ ខែកុម្ភៈ ឆ្នាំ២០២៣។

បេក្ខជន ត្រូវបំពេញសំណុំលិខិតស្នើសុំចុះឈ្មោះចូលរួមវគ្គបណ្តុះបណ្តាលត្រៀមប្រឡងដោយផ្ទាល់ដៃ ហើយត្រូវយកមកដាក់នៅលេខាធិការដ្ឋាន នៃគណៈកម្មការប្រឡងរបស់ក្រសួងពាណិជ្ជកម្ម(នាយកដ្ឋានកម្មសិទ្ធិបញ្ញា)។  

ចំនួនបេក្ខជនដែលអនុញ្ញាតឱ្យចុះឈ្មោះចូលរួមវគ្គបណ្តុះបណ្តាលត្រៀមប្រឡង ត្រូវបានកំណត់ត្រឹមចំនួនសែសិបប្រាំ(៤៥)កន្លែង និងត្រៀមបម្រុងចំនួនប្រាំ (៥) កន្លែង។

ឃ. សំណុំលិខិតស្នើសុំចុះឈ្មោះចូលរួមវគ្គបណ្តុះបណ្តាលត្រៀមប្រឡង

១. ជីវប្រវត្តិសង្ខេប មានបិទរូបថត( ៤x៦) ចំនួន ០១ ច្បាប់

២. បង្កាន់ដៃទទួលពាក្យ(មានគំរូស្រាប់) ចំនួន ០២ ច្បាប់

៣. សាលាកបត្រឯកត្តជន (មានគំរូស្រាប់) ចំនួន ០១ ច្បាប់

៤. ច្បាប់ចម្លងសញ្ញាបត្រដែលមានការបញ្ជាក់ត្រឹមត្រូវឬ

លិខិតបញ្ជាក់ដែលចេញដោយស្ថាប័នមានសមត្ថកិច្ច ចំនួន ០១ ច្បាប់

សំណុំលិខិតស្នើសុំខាងលើអាចទាញយកពីគេហទំព័រ www.cambodiaip.gov.kh

ង. ប្រធានបទនៃវគ្គបណ្តុះបណ្តាលត្រៀមប្រឡង និងប្រធានបទដែលត្រូវប្រឡង

- វគ្គបណ្តុះបណ្តាលត្រៀមប្រឡងមានរយៈពេល ៦៤ ម៉ោង

- ប្រធានបទនៃវគ្គបណ្តុះបណ្តាលត្រៀមប្រឡង និងសម្រាប់ការប្រឡង មានដូចខាងក្រោម៖

១. សញ្ញាណជាមូលដ្ឋាននៃកម្មសិទ្ធិបញ្ញា

២. ការអភិវឌ្ឍប្រព័ន្ធកម្មសិទ្ធិបញ្ញានៅព្រះរាជាណាចក្រកម្ពុជា

៣. កិច្ចព្រមព្រៀងនិងអនុសញ្ញាអន្តរជាតិអនុវត្តចំពោះការចុះបញ្ជីម៉ាក

៤. ទស្សនទានរបស់ម៉ាកសម្គាល់ភូមិសាស្ត្រទំនិញ និងដំណើរការចុះបញ្ជី

៥. និយមន័យនៃការដាក់ពាក្យ និងដំណើរការត្រួតពិនិត្យម៉ាក និងម៉ាកសម្គាល់ភូមិសាស្ត្រទំនិញ

៦. បណ្តឹងជំទាស់ និងសវនាការ

៧. កិច្ចការក្រោយការចុះបញ្ជីម៉ាក

៨. អំពើនៃការប្រកួតប្រជែងមិនស្មោះត្រង់ និងការក្លែងបន្លំ

៩. វិធានការតាមមាត់ច្រកព្រំដែន និងវិធានការបណ្តោះអាសន្ន

១០. ការអនុវត្តច្បាប់ និងការដាក់ទោសទណ្ឌ។

ច. កាលបរិច្ឆេទចាប់ផ្តើមវគ្គបណ្តុះបណ្តាល និងមណ្ឌលសិក្សា

- កាលបរិច្ឆេទវគ្គបណ្តុះបណ្តាល៖ ចាប់ពីថ្ងៃទី១៥ ខែកុម្ភៈ ឆ្នាំ២០២៣

- ម៉ោងសិក្សា៖ រៀងរាល់ព្រឹក ពីម៉ោង ៨:០០ ដល់ ១១:៣០ នាទីព្រឹក

- មណ្ឌលសិក្សា៖ ទីស្តីការក្រសួងពាណិជ្ជកម្ម

ឆ. កាលបរិច្ឆេទប្រឡងជ្រើសរើស និងមណ្ឌលប្រឡង

- កាលបរិច្ឆេទប្រឡង នឹងជូនដំណឹងនៅពេលក្រោយ

- មណ្ឌលប្រឡង ទីស្តីការក្រសួងពាណិជ្ជកម្ម។

ព័ត៌មានលម្អិតផ្សេងៗទៀត  បេក្ខជនអាចទំនាក់ទំនងដោយផ្ទាល់មកលេខាធិការដ្ឋាននៃគណៈកម្មការរៀបចំការប្រឡងនៃក្រសួងពាណិជ្ជកម្ម (នាយកដ្ឋានកម្មសិទ្ទិបញ្ញា) រៀងរាល់ម៉ោងធ្វើការ ឬតាមរយៈទូរស័ព្ទលេខ  ០១១ ៣៣៨ ៣៣៧  ០១២ ៤៥ ៦៧ ៦៧ ។  

សូមអរគុណ!