ឯកឧត្តម ប៉ាន សូរស័ក្ដិ រដ្ឋមន្រ្តីក្រសួងពាណិជ្ជកម្ម ចូលរួមអមសម្តេចអគ្គមហាសេនាបតីតេជោ ហ៊ុន សែន ចូលជួបសម្តែងការគួរសម និងពិភាក្សាការងារជាមួយប្រធានាធិបតីនៃសាធារណរដ្ឋប្រជាមានិតចិន

(ប៉េកាំង,ចិន)៖ នាព្រឹកថ្ងៃទី១០ ខែកុម្ភៈ ឆ្នាំ២០២៣ ដែលជាថ្ងៃទី២ នៃដំណើរបំពេញទស្សនកិច្ចផ្លូចការ នៅរដ្ឋធានីប៉េកាំង សាធារណរដ្ឋប្រជាមានិតចិន ឯកឧត្តម ប៉ាន សូរស័ក្ដិ រដ្ឋមន្រ្តីក្រសួងពាណិជ្ជកម្ម បានចូលរួមអម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ជាមួយគណៈប្រតិភូជាន់ខ្ពស់រាជរដ្ឋាភិបាលកម្ពុជា ជួបសំដែងការគួរសម ឯកឧត្តម ស៊ី ជិនពីង (Xi Jinping) ប្រធានាធិបតី នៃសាធារណរដ្ឋប្រជាមានិតចិន។

ក្នុងឱកាសនោះ ឯកឧត្តម ស៊ី ជិនពីង មានប្រសាសន៍​សំដែងនូវ​ការស្វាគមន៍​ចំពោះសម្តេចតេជោនាយករដ្ឋមន្រ្តី ជាមេដឹកនាំ​ពិភពលោកលើកទី១ ដែលបានអញ្ជើញមក​បំពេញ​ទស្សនកិច្ចនៅ​ប្រទេសចិន បន្ទាប់ពីពិធី​ចូលឆ្នាំ​ថ្មីរបស់ប្រជាជនចិន។

ជាការឆ្លើយតប សម្តេចតេជោ បានអបអរសាទរ ចំពោះការអញ្ជើញមកធ្វើទស្សនកិច្ចផ្លូវការនេះ ហើយក្នុងជំនួបគ្នានេះ ថ្នាក់ដឹកនាំ​ប្រទេស​ទាំង​ពីរ កម្ពុជា-ចិន បានពិភាក្សាយ៉ាងយកចិត្តទុកដាក់ លើកិច្ចសហប្រតិបត្តិការ​ទ្វេភាគី ពហុភាគី និងបញ្ហាអន្តរជាតិ ដោយមានការយកចិត្តទុកដាក់ជាមួយគ្នា។

ឆ្លៀតក្នុងឱកាសនោះ ឯកឧត្តម ស៊ី ជីនពីង មានប្រសាសន៍កោតសរសើរចំពោះស្នាដៃរបស់សម្តេច និង​រាជរដ្ឋាភិបាលកម្ពុជា ក្នុងការដឹកនាំ​កិច្ចប្រជុំកំពូលអាស៊ានទទួលបានជោគជ័យដ៏ត្រចះត្រចង់។ សម្តេចបានថ្លែងអំណរគុណចំពោះមិត្តចិន ដែលបាន​ចូលរួមធានាឱ្យទទួលបានជោគជ័យ។

នៅក្នុងជំនួបគ្នានោះថ្នាក់ដឹកនាំកំពូលនៃប្រទេសទាំងពីរ បានវាយតម្លៃខ្ពស់ចំពោះទំនាក់ទំនងទ្វេភាគី នៃប្រទេសទាំងពីរ ដែលឈាន​ពីកិច្ចសហប្រតិបត្តិគ្រប់ជ្រុងជ្រោយ ទៅជាមិត្តដែកថែម និងឈានទៅកិច្ចសហប្រតិបត្តិការសហគមន៍រួម ជោគវាសនាតែមួយ ជាពិសេស បានឯកភាព​គ្នាក្នុង​ការជំរុញ​កិច្ចសហប្រតិបត្តិការ «ត្បូងពេជ្រ» ដើម្បីជំរុញទំនាក់ទំនងនៃ​ប្រទេសទាំងពីរ​ឈានដល់​ចំណុច​កំពូលថ្មីមួយទៀត។

ជាលទ្ធផល ថ្នាក់ដឹកនាំប្រទេសទាំងពីរ ប្រកាសបន្តពង្រឹងស្មារតីកសាងសហគមន៍តែមួយ ជោគវាសនាតែមួយ ដែលផ្តោតសំខាន់​លើវិស័យ​ចំនួន ៦ រួមមានទី១) នយោបាយ និងការទូត ២) វិស័យសមត្ថភាព​ផលិត និងវាយភណ្ឌ ៣)កសិកម្ម ៤) ថាមពល ៥) សន្តិសុខ ៦) ទំនាក់ទំនងរវាងប្រជាជន និង​ប្រជាជន រួមទាំងការលើកកម្ពស់វិស័យ​សុខាភិបាល​នៅ​កម្ពុជា៕