សេចក្ដីជូនដំណឹងស្ដីពី៖ការលក់ផលិតផលខ្មែរក្រោមកម្មវិធីស្ដីពីកិច្ចសហការជំរុញ និងបង្កើនការលក់ផលិតផលខ្មែរនៅស្ថានីយប្រេងឥន្ធនៈភីធីធីតាមបណ្តារាជធានី-ខេត្ត

ក្រសួងពាណិជ្ជកម្ម មានកិត្ដិយសសូមជម្រាបជូនសាធារណជនទាំងអស់មេត្ដាជ្រាបថា៖ អគ្គនាយកដ្ឋានជំរុញពាណិជ្ជកម្មនៃក្រសួងពាណិជ្ជកម្មបានសហការជាមួយក្រុមហ៊ុន ភីធីធី (ខេមបូឌា) អនុវត្ដគម្រោងជំរុញការលក់ផលិតផលខ្មែរក្រោមកម្មវិធីស្ដីពីកិច្ចសហការជំរុញ និងបង្កើនការលក់ផលិតផលខ្មែរនៅស្ថានីយប្រេងឥន្ធនៈភីធីធីតាមបណ្តារាជធានី-ខេត្ត ក្នុងគោលបំណងជួយជ្រោមជ្រែងលើកកម្ពស់ផលិតផលខ្មែរដែលជាផលិតផលលក្ខណៈគ្រួសារតូចៗ លើទីផ្សារក្នុងស្រុក  ការអភិវឌ្ឍវិស័យពាណិជ្ជកម្មកម្ពុជា  នៅលើមូលដ្ឋាននៃតម្លាភាព និងផលប្រយោជន៍សហគមន៍។  

គម្រោងនេះបានអនុវត្ដដោយជោគជ័យក្នុងឆ្នាំ២០២២ រួចមកហើយ នៅរាជធានី-ខេត្ដចំនួន ១១ តាមបណ្ដាស្ថានីយប្រេងឥន្ធនៈភីធីធីចំនួន ២០។ នៅឆ្នាំ២០២៣នេះ ក្រសួងពាណិជ្ជកម្ម និងក្រុមហ៊ុន ភីធីធី (ខេមបូឌា) នឹងសហការពង្រីកការអនុវត្ដគម្រោងដដែលនៅក្នុងរាជធានី-ខេត្ដចំនួន ១៦ តាមបណ្ដាស្ថានីយប្រេងឥន្ធនៈភីធីធីចំនួន ១៩ គឺ រាជធានីភ្នំពេញៈ នៅស្ថានីយប្រេងឥន្ធនៈភីធីធីព្រៃកី ខេត្ដកណ្ដាលៈ នៅស្ថានីយប្រេងឥន្ធនៈភីធីធីតាខ្មៅផ្លូវជាតិលេខ ២១  ខេត្ដកំពង់ចាមៈ នៅស្ថានីយប្រេងឥន្ធនៈភីធីធីផ្ដៅជុំ២ ខេត្ដក្រចេះ: នៅស្ថានីយប្រេងឥន្ធនៈភីធីធីក្រុងក្រចេះ ខេត្ដស្ទឹងត្រែងៈ នៅស្ថានីយប្រេងឥន្ធនៈភីធីធីក្រុងស្ទឹងត្រែងជិតរង្វង់មូលថ្មី ខេត្ដព្រៃវែងៈ នៅស្ថានីយប្រេងឥន្ធនៈភីធីធីស្វាយអន្ទរ ខេត្ដស្វាយរៀងៈ នៅស្ថានីយប្រេងឥន្ធនៈភីធីធីក្រុងស្វាយរៀង ខេត្ដកំពង់ឆ្នាំងៈ នៅស្ថានីយប្រេងឥន្ធនៈភីធីធីឧដ្ដុង្គ និងភីធីធីក្រុងកំពង់ឆ្នាំង ខេត្ដពោធិ៍សាត់ៈ នៅស្ថានីយប្រេងឥន្ធនៈភីធីធីក្រុងពោធិ៍សាត់ ខេត្ដបាត់ដំបងៈ នៅ្ស្ថានីយប្រេងឥន្ធនៈភីធីធីអូរចារ ខេត្ដសៀមរាបៈ នៅស្ថានីយប្រេងឥន្ធនៈភីធីធីសៀងណាំ ខេត្ដបន្ទាយមានជ័យៈ នៅស្ថានីយប្រេងឥន្ធនៈភីធីធីបន្ទាយមានជ័យ ខេត្ដកំពង់ស្ពឺៈ នៅស្ថានីយប្រេងឥន្ធនៈភីធីធីរលាំងសង្កែ និងភីធីធីត្រាំខ្នារ ខេត្ដតាកែវៈ នៅស្ថានីយប្រេងឥន្ធនៈភីធីធីសុខកែវជិតរង្វង់មូលក្បែរផ្សាររាត្រី និងភីធីធីអង្គតាសោម ខេត្ដកំពតៈ នៅស្ថានីយប្រេងឥន្ធនៈភីធីធីទីរួមខេត្ដកំពត និងខេត្ដព្រះសីហនុៈ នៅស្ថានីយប្រេងឥន្ធនៈភីធីធីឃ្លាំងលើ ដោយដាក់តាំងលក់ផលិតផលដូចជាអាហារសម្រន់ បង្អែម ផ្លែឈើតាមរដូវកាល វត្ថុអនុស្សាវរីយ៍ សម្ភារៈធ្វើដោយដៃ និងបន្លែ ត្រី សាច់ជាដើម។  

យោងតាមសារលិខិតរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ប្រធានកិត្ដិយសគណៈកម្មាធិការជាតិជំរុញចលនាភូមិមួយផលិតផលមួយ ក្នុងឱកាសអបអរសាទរទិវាជាតិលើកកម្ពស់ការប្រើប្រាស់ផលិតផលខ្មែរ ៩ មេសា លើកទី៥ ឆ្នាំ២០២២ ក្រោមប្រធានបទ “គាំទ្រផលិតផលខ្មែរ គឺថែរក្សាសេដ្ឋកិច្ចជាតិ” ដាក់ឱ្យប្រើពាក្យស្លោក “ប្រជាជនម្នាក់ទិញផលិតផលខ្មែរយ៉ាងតិចមួយមុខ”។

ការដាក់តាំងបង្ហាញលក់នៅតាមស្ថានីយប្រេងឥន្ធនៈភីធីធី នឹងចាប់ផ្ដើមនៅរៀងរាល់ថ្ងៃសុក្រ ថ្ងៃសៅរ៍ និងថ្ងៃអាទិត្យ ក្នុងខែមីនា ខែឧសភា ខែកញ្ញា និងខែវិច្ឆិកា ឆ្នាំ២០២៣ខាងមុខនេះ។ ព័ត៌មានលម្អិតសូមទំនាក់ទំនងលេខ៖ ០១២ ៨៥១ ២៣៩, ០៩៩ ៩៥៤ ៥៦៥, ០៨៩ ៣៦០ ៣៣៣។

សូមអរគុណ!

សូមស្វែងរកទីតាំងតាមរយៈតំណរលីងនេះ៖ https://cutt.ly/e8ZsLYH