អគ្គនាយកដ្ឋាន ក.ប.ប. និង GIZ សហការគ្នារៀបចំ សិក្ខាសាលាផ្សព្វផ្សាយស្តីពី «ការអនុវត្តច្បាប់ស្តីពីការប្រកួតប្រជែង ច្បាប់ស្តីពីកិច្ចការពារអ្នកប្រើប្រាស់ ច្បាប់ស្តីពីសុវត្ថិភាពម្ហូបអាហារ និងបទប្បញ្ញត្តិពាក់ព័ន្ធ»

(ខេត្តព្រះសីហនុ)៖ នាព្រឹកថ្ងៃទី២៧ ខែមេសា ឆ្នាំ២០២៣ នៅសណ្ឋាគារ ឯករាជ្យ ខេត្តព្រះសីហនុ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) នៃក្រសួងពាណិជ្ជកម្ម និងទីភ្នាក់ងារ GIZ បានសហការគ្នារៀបចំ សិក្ខាសាលាផ្សព្វផ្សាយស្តីពី «ការអនុវត្តច្បាប់ស្តីពីការប្រកួតប្រជែង ច្បាប់ស្តីពីកិច្ចការពារអ្នកប្រើប្រាស់ ច្បាប់ស្តីពីសុវត្ថិភាពម្ហូបអាហារ និងបទប្បញ្ញត្តិពាក់ព័ន្ធ» ក្រោមអធិបតីភាពរបស់ ឯកឧត្តម ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកអគ្គនាយកដ្ឋាន ក.ប.ប. និងជាប្រធានលេខាធិការដ្ឋាននៃ គ.ជ.ក.ប. ជាមួយ ឯកឧត្តម លៀម សុដា អភិបាលរងនៃគណៈអភិបាលខេត្តព្រះសីហនុ និងលោកស្រី គង់ ដារ៉ែន ទីប្រឹក្សាជាន់ខ្ពស់សម្រាប់កិច្ចសហប្រតិបត្តិការសេដ្ឋកិច្ចនិងការអភិវឌ្ឍន៍វិស័យឯកជន GIZ ដោយមានការចូលរួមពីអាជីវករក្នុងខេត្តព្រះសីហនុ សភាពាណិជ្ជកម្មកម្ពុជាខេត្តព្រះសីហនុ សភាពាណិជ្ជកម្មកម្ពុជាខេត្តកោះកុង សភាពាណិជ្ជកម្មកម្ពុជាខេត្តកំពង់ស្ពឺ អង្គភាពមន្ទីរជុំវិញខេត្តព្រះសីហនុ មន្ទីរពាណិជ្ជកម្មខេត្តកោះកុង ខេត្តកំពង់ស្ពឺ ស្ថាប័នអយ្យការអមសាលាឧទ្ធរណ៍ និងសាលាដំបូងខេត្តព្រះសីហនុ សិស្ស-និស្សិត និងមន្រ្តីសាខា ក.ប.ប. តាមបណ្ដាខេត្ត ដែលរួមមានខេត្តព្រះសីហនុ ខេត្តកោះកុង និងខេត្តកំពង់ស្ពឺ ជាសរុបប្រមាណ ១៥០នាក់។

ក្នុងឱកាសនោះ ឯកឧត្តមប្រតិភូ បានលើកឡើងថា សិក្ខាសាលានេះ នឹងដើរតួជាវេទិកាមួយក្នុងការផ្សព្វផ្សាយ ដើម្បីបញ្រ្ជាបការយល់ដឹងដល់ភាគីពាក់ព័ន្ធនានា រួមមាន៖ ធុរជន អ្នកប្រើប្រាស់ និងមន្រ្តីអនុវត្តច្បាប់ឱ្យបានទូលំទូលាយអំពីការអនុវត្ត និងអត្ថប្រយោជន៍នៃច្បាប់ទាំង៣ ព្រមទាំងអនុក្រឹត្យស្តីពីការគ្រប់គ្រងការផ្សាយពាណិជ្ជកម្មលើផលិតផលទំនិញនិងសេវា និងអនុក្រឹត្យស្តីពីលក្ខខណ្ឌនីតិវិធីអំពីការរួមបញ្ចូលគ្នានៃធុរកិច្ច ដែលរាជរដ្ឋាភិបាលទើបអនុម័តនាពេលថ្មីៗនេះ ក្នុងការជំរុញឱ្យមានការប្រកួតប្រជែងក្នុងពាណិជ្ជកម្មប្រព្រឹត្តទៅប្រកប ដោយសមធម៌ ព្រមទាំងការធ្វើធុរកិច្ចដោយស្មោះត្រង់និងសុចរិត ការពារផលប្រយោជន៍និងសុខុមាលភាពរបស់អ្នកប្រើប្រាស់ ព្រមទាំងបង្ហាញពីបទល្មើសនិងទោសទណ្ឌក្រោមបទប្បញ្ញត្តិផងដែរដល់អ្នកចូលរួម។

ឯកឧត្តមប្រតិភូ បានបញ្ជាក់ផងដែរថា សិក្ខាសាលានាថ្ងៃនេះ គឺជាសិក្ខាសាលាលើកទី៤ ក្នុងឆ្នាំ២០២៣ ពាក់ព័ន្ធនឹងច្បាប់ស្តីពីការប្រកួតប្រជែង ច្បាប់ស្តីពីកិច្ចការពារអ្នកប្រើប្រាស់ ច្បាប់ស្តីពីសុវត្ថិភាពម្ហូបអាហារ និងអនុក្រឹត្យស្តីពីការគ្រប់គ្រងការផ្សាយពាណិជ្ជកម្មលើផលិតផលទំនិញនិងសេវា ចំណែកឯអនុក្រឹត្យស្តីពីលក្ខខណ្ឌនីតិវិធីអំពីការរួមបញ្ចូលគ្នានៃធុរកិច្ចគឺជាបទបង្ហាញលើកទី២ ហើយគ្រោងនឹងរៀបចំឡើងចំនួន ២លើកបន្ថែមទៀត នៅទូទំាងប្រទេស តាមចង្កោមរាជធានី-ខេត្ត។

សូមរំលឹកជូនថា ក្នុងឆ្នាំ២០២២ កន្លងមក សិក្ខាសាលាផ្សព្វផ្សាយច្បាប់ទាំង៣នេះ ត្រូវបានរៀបចំរួចហើយនៅទូទាំងប្រទេស ដោយអគ្គនាយកដ្ឋាន ក.ប.ប. និងទីភ្នាក់ងារ GIZ៕