ឯកឧត្តម កឹម​ ស៊ីថន​ រដ្ឋលេខាធិការប្រចាំការនៃ ក្រសួងពាណិជ្ជកម្ម អញ្ជើញ​ដឹកនាំ​គណៈ​ប្រតិភូ​ក្រសួង​ពាណិជ្ជកម្ម ចូលរួមគោរពវិញ្ញាក្ខន្ធសព ឯកឧត្តម សំ ព្រហ្មនា សមាជិកក្រុមប្រឹក្សាធម្មនុញ្ញ

(ភ្នំពេញ) ៖ នារសៀលថ្ងៃទី៧ ខែសីហា ឆ្នាំ២០២៣ គណៈប្រតិភូក្រសួងពាណិជ្ជកម្ម ដឹកនាំដោយ ឯកឧត្តម កឹម​ ស៊ីថន រដ្ឋលេខាធិការប្រចាំការនៃ ក្រសួងពាណិជ្ជកម្ម បានអញ្ជើញចូលរួមគោរពវិញ្ញាណក្ខន្ធចំពោះសពរបស់ ឯកឧត្តម សំ ព្រហ្មនា សមាជិកក្រុមប្រឹក្សាធម្មនុញ្ញ ដែលបានទទួលមរណភាព កាលពីថ្ងៃសុក្រ ៣រោច ខែទុតិយាសាឍ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី៤ ខែសីហា ឆ្នាំ២០២៣ វេលាម៉ោង ១៣:០០ នាទីរសៀល ក្នុងជន្មាយុ៨១ឆ្នាំ ដោយរោគាពាធ នៅគេហដ្ឋានសព ស្ថិតនៅគេហដ្ឋានលេខ៩ ផ្លូវលេខ៥៦៨ ភូមិ៣ សង្កាត់បឹងកក់២ ខណ្ឌទួលគោក រាជធានីភ្នំពេញ។

មរណភាពរបស់ ឯកឧត្តម សំ ព្រហ្មនា  គឺជាការបាត់បង់នូវឳពុក ឳពុកក្មេក និងជីតា​ និងជីតាទួតជាទីគោរពស្រឡាញ់យ៉ាងជ្រាលជ្រៅ និងប្រកបដោយព្រហ្មវិហារធម៌ដ៏ថ្លៃថ្លារបស់ឯកឧត្តម និងក្រុមគ្រួសារទាំងមូល ដែលកន្លងមក ឯកឧត្តម សំ ព្រហ្មនា  បានបីបាច់ថែរក្សា អប់រំណែនាំ និងផ្តល់ដំបូន្មានល្អៗដល់កូន ចៅ ចៅទួត​ រហូតក្លាយជាបញ្ញវន្ត និងជាថ្នាក់ដឹកនាំសម្រាប់សង្គមជាតិ ហើយក៏ជាការបាត់បង់នូវឥស្សរជនខ្មែរដ៏ឆ្នើមមួយរូបដែលបានលះបង់ទាំងកម្លាំងកាយ ប្រាជ្ញា និងស្មារតី ក្នុងការចូលរួមចំណែកលើកកម្ពស់វិស័យនីតិរដ្ឋ និង លទ្ធិប្រជាធិបតេយ្យ​ឱ្យបានឋិតថេរចីរកាល​ក្នុង​ព្រះរាជាណាចក្រ​កម្ពុជា។

ស្ថិតក្នុងបរិយាកាសដ៏សែនសោកសង្រេង ប្រកបសោយសេចក្តីក្រៀមក្រំបំផុតនេះ គណៈប្រតិភូក្រសួង​ពាណិជ្ជកម្ម ដឹកនាំដោយ ឯកឧត្តម​ កឹម​ ស៊ីថន​ រដ្ឋលេខាធិការប្រចាំការ នៃក្រសួងពាណិជ្ជកម្ម សូមចូលរួមរំលែកទុក្ខជាមួយ ឯកឧត្តម សំ ព្រហ្មនី និងក្រុមគ្រួសារ ចំពោះមរណភាពរបស់ឯកឧត្តម សំ ព្រហ្មនា និងសូមបួងសួងដួងវិញ្ញាណក្ខន្ធរបស់ ឯកឧត្តម សំ ព្រហ្មនា បានយោនយោគកំណើត​ក្នុងសុគតិភព​កុំបីឃ្លៀងឃ្លាតឡើយ៕