ឯកឧត្តម ប៊ុន ចន្ធី អនុរដ្ឋលេខាធិការ ចូលរួមសន្និសីទនៃបណ្តាប្រទេស អាស៊ីប៉ា-ស៊ីហ្វិក ស្តីពីបរិយាប័ន្ន ហិរញវត្ថុនិងការអភិវឌ្ឍ​ប្រកបដោយចីរភាព

(ទីក្រុងដាកា, បង់ក្លាដែស)៖ ឯកឧត្តម ប៊ុន ចន្ធី អនុរដ្ឋលេខាធិការ បានចូលរួមជាវាគ្មិនកិត្តិយសក្នុងសន្និសីទនៃបណ្តារប្រទេស អាស៊ីប៉ា-ស៊ីហ្វិក ស្តីពីបរិយាប័ន្នហិរញវត្ថុ និងការអភិវឌ្ឍ​ប្រកបដោយចីរភាព ដែលប្រព្រឹត្តទៅកាលពីថ្ងៃទី១០-១២ ខែធ្នូ ឆ្នាំ២០១៩ នៅទីក្រុងដាកា ប្រទេសបង់ក្លាដែស ដោយមានអ្នកចូលរួមមកពីបណ្ដាប្រទេសនៅក្នុងតំបន់ចំនួនប្រមាណ ១,០០០ នាក់។

នៅ​ក្នុងនាមជាវាគ្មិនកិត្តិយស ឯកឧត្តម​អនុរដ្ឋលេខាធិការ បានមាន​ប្រសាសន៍​ដោយសង្ខេបជូនអង្គសន្និសីទ ​ដូចជា៖

១.ស្ថានភាពទូទៅអំពីសេដ្ឋកិច្ចនយោបាយ និងសង្គមនៅកម្ពុជា

២.​កម្មវិធីនយោបាយរបស់រាជរដ្ឋាភិបាល យុទ្ធសាស្ត្រចតុកោណដំណាក់ការទី៤ និងផែនការអភិវឌ្ឍឧស្សាហកម្ម ២០១៥-២០២៥

៣.ការចូលរួមរបស់ក្រសួងពាណិជ្ជកម្មកម្ពុជា ក្នុងការពង្រឹងការអនុវត្តយុទ្ធសាស្ត្រជាតិ ស្ដីពី​បរិយាប័ន្នហរញវត្ថុ។

៤.​អត្ថប្រយោជន៍នៃយុទ្ធសាស្ត្របរិយាប័ន្នហិរញវត្ថុរបស់កម្ពុជា ដែលស្របទៅនឹងគោលដៅអភិវឌ្ឍន៍ប្រកប​ដោយចីរភាព របស់អង្គការសហប្រជាជាតិ ដែលមានសកម្មភាពជាអទិភាព ដូចជា៖ ១. លើកកំពស់ការសន្សំនៅក្នុងស្ថាប័នហរញវត្ថុផ្លូវការ, ២. ជំរុញផលិតផលឥណទាននវានុវត្ត សម្រាប់សហគ្រាសមីក្រូ ខ្នាតតូច និងមធ្យម, ៣. ការពង្រីកសមត្ថភាពប្រព័ន្ធទូទាត់, ៤. លើកកម្ពស់ការចូលរួមក្នុងវិស័យធានារ៉ាប់រង, ៥. ពង្រឹងសមត្ថភាពរបស់បញ្ញត្តិករក្នុងវិស័យហិរញវត្ថុ និង៦. បង្កើន និងការពារ ប្រសិទ្ធភាពរបស់អ្នកប្រើប្រាស់ និងតម្លាភាព នៃវិស័យហរញវត្ថុ។

ទន្ទឹមនេះដែរ អង្គសន្និសីទទាំងមូល ក៏បានពិភាក្សាទៅលើចំណុចមួយចំនួនទៀតដូចជា:

- ហានិភ័យ និងស្ថេរភាពហិរញវត្ថុ និងកាលានុវត្តភាពសម្រាប់វិស័យធនាគារ

- សន្តិសុខក្នុងប្រព័ន្ធអេឡិចត្រូនិក និង 5G សម្រាប់ចិរភាពកំណើន (5G for sustainable growth) និង

- កិច្ចសហប្រតិបត្តិការរវាងរដ្ន និងវិស័យឯកជន តាមរយៈគំនិតផ្ដួចផ្តើមជាសកលនៃផ្លូវ និងខ្សែក្រវាត់ ដើម្បីទទួលបាននូវបរិយាប័ន្ន និងការវិនិយាគ និងអជីវកម្មប្រកបដោយចីរភាព។