ក្រសួងពាណិជ្ជកម្ម

សម្តេចអគ្គមហាសេនាបតីតេជោ ហ៊ុន សែន អញ្ជើញចូលរួមជាគណៈអធិបតីដ៏ខ្ពង់ខ្ពស់ ក្នុងពិធីសម្ពោធផ្សារគំរូព្រំដែនកម្ពុជា (ផ្សារដារ)

ថ្ងៃទី២៤ ខែធ្នូ ឆ្នាំ២០១៩ ម៉ោង ០៧:១៩ នាទី យប់

👁 0

(ខេត្តត្បូងឃ្មុំ)៖ ថ្ងៃអង្គារ ១៣រោច ខែមិគសិរ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី២៤ ខែធ្នូ ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា និងឯកឧត្តម ឈឹញ ឌិញ យ៉ុង ឧបនាយករដ្ឋមន្រ្តី នៃសាធារណរដ្ឋសង្គមនិយមវៀតណាម អញ្ជើញចូលរួមពិធីសម្ពោធផ្សារគំរូព្រំដែនកម្ពុជា ដែលមានទីតាំងស្ថិតនៅភូមិដារកណ្តោល ឃុំដារ ស្រុកមេមត់ ខេត្តត្បូងឃ្មុំ។ ការសម្ពោធផ្សារគំរូព្រំដែននាថ្ងៃនេះ ក៏មានការរៀបចំតាំងពិព័រណ៍ពាណិជ្ជកម្មកម្ពុជា-វៀតណាម រួមទាំងជំនួបធុរកិច្ចកម្ពុជា-វៀតណាម ដោយបង្ហាញពីកិច្ចសហប្រតិបត្តិការល្អ ដើម្បីពង្រឹង និងពង្រីកទំហំពាណិជ្ជកម្មនៃអាជីករ និងពាណិជ្ជករកម្ពុជា និងវៀតណាម ក្នុងការចាប់ដៃគូពាណិជ្ចកម្ម និងការនាំចេញ-នាំចូលឱ្យកាន់តែខ្លាំងខ្លា និងបង្កភាពងាយស្រួលតាមច្រកព្រំដែននៃប្រទេសទាំងពីរ។

ដើម្បីឱ្យអបអរសារទរចំពោះសម្ធទិផលនៃការសម្ពោធផ្សារគំរូព្រំដែនកម្ពុជា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានឡើងថ្លែងសុន្ទរកថាចំពោះកិច្ចសហប្រតិបត្តិការរវាងប្រទេសកម្ពុជា និងវៀតណាម ជាពិសេក្រសួងពាណិជ្ជកម្មកម្ពុជា និងក្រសួងឧស្សាហកម្ម និងពាណិជ្ជកម្មវៀតណាម ដែលបង្កើតឱ្យមានផ្សារគំរូព្រំដែនកម្ពុជានេះឡើង ជាសម្ធទិផលដំបូង ក្នុងការពង្រីកទំហំពាណិជ្ជកម្មរវាងប្រទេសទាំងពីរឱ្យកាន់តែមានសក្តានុពល ដើម្បីសម្រួលជូនធុរជន និងវិនិយោគគិន មានភាពងាយស្រួលក្នុងការដោះដូរទំនិញ និងធ្វើជំនួបពាណិជ្ជកម្មនៅផ្សារគំរូនេះតែម្តង។ កម្ពុជាសង្ឃឹមថា ការសហរវាងកម្ពុជា និងវៀតណាម នឹងជំរុញឱ្យសម្ធទិផលនានានៅថ្ងៃខាងមុខជាបន្តបន្ទាប់ ដោយរាជរដ្ឋាភិបាលកម្ពុជានឹងខិតខំស្វែងរកទីផ្សារថ្មីៗ ដើម្បីបង្កលក្ខណៈងាយស្រួលជូនប្រជាជន។ សម្តេចអគ្គមហាសេនាបតីតេជោ នាយករដ្ឋមន្ត្រី បានធ្វើការបញ្ជាក់ជូនថា ការសាងសង់ផ្សារព្រំដែននៅខេត្តស្វាយរៀង និងខេត្តកំពត នឹងត្រូវចំណាយដោយថវិការជាតិរបស់កម្ពុជា ទោះបីជាប្រទេសវៀតណាមយល់ព្រមផ្តល់ជូនតាមការស្នើសុំរបស់កម្ពុជា ចំពោះការសាងសង់ផ្សារព្រំដែនទាំងពីរខាងលើ ដោយបង្វិលថវិកាទាំងនេះសម្រាប់ការសាងសង់ នៅតាមបណ្តាលខេត្តនានាជាប់ព្រំប្រទល់ប្រទេសកម្ពុជា និងវៀតណាមវិញ។

នាក្នុងឱកាសពិធីសម្ពោធនេះ ឯកឧត្តម ឈឹញ ឌិញ យ៉ុង (Trinh Dinh Dung) ឧបនាយករដ្ឋមន្រ្តី នៃសាធារណរដ្ឋសង្គមនិយមវៀតណាម ជាតំណាងរបស់ដ៏ខ្ពង់ខ្ពស់របស់ ឯកឧត្តម ង្វៀន ស៊ួនហ្វុក នាយករដ្ឋមន្រ្តី នៃសាធារណរដ្ឋសង្គមនិយមវៀតណាម បានអញ្ជើញចូលរួម និងថ្លែងសុន្ទរកថាពីការបង្កើតឱ្យមានផ្សារគំរូព្រំដែននេះ ដើម្បីរឹតចំណងមិត្តភាព និងសាមគ្គីភាពវាងកម្ពុជា និងវៀតណាម ក្នុងការបង្កើតឱ្យចេញរូបរាងផ្សារគំរូនេះ ក្រោមការខិតខំប្រឹងប្រែងសហការសាងសង់ ដើម្បីជំរុញវិនិយោគ សេដ្ឋកិច្ច និងពាណិជ្ជកម្ម ដោយរដ្ឋាភិបាលនៃសាធារណរដ្ឋសង្គមនិយមវៀតណាម នឹងបន្តកិច្ចសហប្រតិបត្តិការកាន់តែរឹងមុំាង និងការផ្លាស់ប្តូរទស្សនកិច្ចសម្រាប់គណៈប្រតិភូជាន់ខ្ពស់។

ជាកិច្ចបន្ទាប់នៃពិធីសម្ពោធ ឯកឧត្តម ប៉ាន សូរស័ក្តិ រដ្ឋមន្រ្តីនៃក្រសួងពាណិជ្ជកម្ម នៃព្រះរាជាណាចក្រកម្ពុជា បានឡើងថ្លែងសុន្ទរកថាស្វាគមន៍ រាយការណ៍សង្ខេបពីការសាងសង់ផ្សារគំរូព្រំដែនកម្ពុជា ដែលរាជរដ្ឋាភិបាលកម្ពុជា បានខិតខំប្រឹងប្រែងកន្លងមក ក្រោមការដឹកនាំដ៏ឆ្លាតវៃរបស់ សម្តេចតេជោនាយករដ្ឋមន្រ្តី នៃព្រះរាជាណាចក្រកម្ពុជា ដាក់ឱ្យមាននូវយុទ្ធសាស្រ្តឈ្នះ-ឈ្នះ ដើម្បីជំរុញការវិនិយោគ សេដ្ឋកិច្ច និងពាណិជ្ជកម្ម មានការអភិវឌ្ឍនរីកចម្រើនទៅមុខជាលំដាប់។ ការសាងសង់ផ្សារគំរូនេះ ត្រូវចំណាយពេលអស់រយៈ ២៤ខែ មានតូបសរុបចំនួន៦៨តូប និងបានបញ្ចប់គម្រោងនៅថ្ងៃទី២៤ ខែធ្នូ ឆ្នាំ២០១៩ នេះ ក្រោមហិរញ្ញប្បទានឥតសំណងរបស់រដ្ឋាភិបាលវៀតណាម ផ្តល់ជូនរាជរដ្ឋាភិបាលកម្ពុជា ប៉ុន្តែក្រសួងសេដ្ឋកិច្ច និងហិរញ្ញវត្ថុរបស់កម្ពុជាត្រូវចំណាយសរុបជាង៧០០លានរៀល លើការសាងសង់តូបក្នុងផ្សារនេះផងដែរ។ ឯកឧត្តមរដ្ឋមន្រ្តីក្រសួងពាណិជ្ជកម្ម បានគូសបញ្ជាក់ថា ការបង្កើតឱ្យមានផ្សារគំរូព្រំដែននេះ នឹងសម្រួលការនាំចេញ-នាំចូល បង្កើតការងារ និងបង្កើនប្រាក់ចំណូលដល់ប្រជាជនទាំងពីរ។

នាឱការនេះផងដែរ ឯកឧត្តម ត្រាង ទ័ន អាន់ (Tran Tuan Anh) រដ្ឋមន្រ្តីនៃក្រសួងឧស្សាហកម្ម និងពាណិជ្ជកម្ម នៃសាធារណរដ្ឋសង្គមនិយមវៀតណាម បានឡើងថ្លែងសុន្ទរកថាជាសង្ខេបពីទំហំពាណិជ្ជកម្មរវាងកម្ពុជា និងវៀតណាម មានទំហំរហូតដល់៤,៨១ ពាន់លានដុល្លា ដែលមានការកើនឡើងរហូតដល់១១ភាគរយ គិតត្រឹមខែវិច្ឆិកា ឆ្នាំ២០១៩ នេះ។ ឯកឧត្តមរដ្ឋមន្រ្តី ក៏បានបន្តទៀតថា កិច្ចសហប្រតិបត្តិការរវាកម្ពុជា និងវៀតណាម ក្នុងការសាងសង់ផ្សារគំរូ នឹងផ្តល់នូវអត្ថប្រយោជន៍ក្នុងការតភ្ជាប់ហេដ្ឋារចនាសម្ព័ន្ធ លើកកម្ពស់ជីវភាពប្រជាជនតាមព្រំដែន និងបង្កើនប្រាក់ចំណូលជូនប្រជានជនទាំងពីរ ព្រមទាំងបន្តចំណងមិត្តភាពរវាងកម្ពុជា និងវៀតណាមឱ្យកាន់តែស៊ីជម្រៅ។

ឆ្លៀតក្នុងឱកាសនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានផ្តល់កិត្តិយសបំពាក់មេដាយជូនថ្នាក់ដឹកនាំ និងមន្រ្តីរាជការកម្ពុជា និងវៀតណាម ព្រមទាំងសប្បុរសជនកម្ពុជា ទាំង១១រូប ដែលបានខិតខំប្រឹងប្រែងទាំងកំលាំងកាយចិត្ត និងពេលវេលារបស់ខ្លួន បង្កើតឱ្យមាននូវសម្ធទិផលនេះឡើង ដើម្បីបម្រើជូនអាជីករ និងពាណិជ្ជករកម្ពុជា និងវៀតណាម ក៏ដូចជាប្រជាជនទាំងអស់បានប្រើប្រាស់ផ្សារនេះផងដែរ។

ដើម្បីពង្រឹកនូវកិច្ចសហប្រតិបត្តិការរវាងប្រទេសកម្ពុជា និងវៀតណាម ឯកឧត្តមរដ្ឋមន្រ្តីនៃក្រសួងពាណិជ្ជកម្ម នៃព្រះរាជាណាចក្រកម្ពុជា និង ឯកឧត្តមរដ្ឋមន្រ្តីនៃក្រសួងឧស្សាហកម្ម និងពាណិជ្ជកម្ម នៃសាធារណរដ្ឋសង្គមនិយមវៀតណាម បានចុះហត្ថលេខា ប្រគល់-ទទួលផ្សារគំរូព្រំដែនកម្ពុជា (ផ្សារដារ) ទុកជាសាក្ខីភាពនៃប្រទេសទាំងពីរក្រោយអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ នាយករដ្ឋមន្រ្តី នៃព្រះរាជាណាចក្រកម្ពុជា និង ឯកឧត្តម ឧបនាយករដ្ឋមន្រ្តី នៃសាធារណរដ្ឋសង្គមនិយមវៀតណាម នឹងបានប្រកាសដាក់ឱ្យប្រើប្រាស់ចាប់ពីថ្ងៃចុះហត្ថលេខានេះតទៅ៕

ព័ត៌មានថ្មីៗ

សេចក្ដីជូនដំណឹងស្ដីពី៖ ការលក់ផលិតផលខ្មែរក្រោមកម្មវិធីស្ដីពីកិច្ចសហការជំរុញ និងបង្កើនការលក់ផលិតផលខ្មែរនៅស្ថានីយប្រេងឥន្ធនៈភីធីធីតាម បណ្តារាជធានី-ខេត្ត ដំណាក់កាលទី២ ត្រីមាសទី៣ ឆ្នាំ២០២៣

ថ្ងៃទី០៤ ខែកញ្ញា ឆ្នាំ២០២៣ ម៉ោង ០៣:១៥ នាទី យប់

សេចក្តីជូនដំណឹងស្ដីពី៖ តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី ១ ដល់ថ្ងៃទី ១០ ខែកញ្ញា ឆ្នាំ២០២៣

ថ្ងៃទី០១ ខែកញ្ញា ឆ្នាំ២០២៣ ម៉ោង ០៣:០៧ នាទី រសៀល

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម ទទួលជួបសម្តែងការគួរសមជាមួយឯកឧត្តម Francisco Kalbuadi Lay ឧបនាយករដ្ឋមន្ត្រី រដ្ឋមន្ត្រីសម្របសម្រួលកិច្ចការសេដ្ឋកិច្ច និងជារដ្ឋមន្ត្រីក្រសួងទេសចរណ៍ និងបរិស្ថាន នៃប្រទេសទីម័រខាងកើត

ថ្ងៃទី២៨ ខែសីហា ឆ្នាំ២០២៣ ម៉ោង ០៧:៣៥ នាទី យប់

ព័ត៌មានថ្មីៗ

ស្លាក