ឯកឧត្តមរដ្ឋមន្ត្រីក្រសួងពាណិជ្ជកម្ម អញ្ជើញជាអធិបតីក្នុងពិធីបើកព្រឹត្តិការណ៍ «កាលានុវត្តភាព​ធុរកិច្ចក្នុងវិស័យកសិកម្មនៅកម្ពុជា ២០២០» និងជួបជាមួយធុរជនអាមេរិក

នៅព្រឹកថ្ងៃទី០៦ ខែកុម្ភៈ ឆ្នាំ២០២០ឯកឧត្តម ប៉ាន សូរស័ក្ដិ រដ្ឋមន្ត្រីក្រសួង​ពាណិជ្ជកម្ម បាន​អញ្ជើញជាអធិបតីក្នុងពិធីបើកព្រឹត្តិការណ៍«កាលានុវត្តភាពធុរកិច្ចក្នុងវិស័យកសិកម្មនៅកម្ពុជា ២០២០»ដែលរៀបចំឡើងដោយស្ថានទូតនៃសហរដ្ឋអាមេរិកប្រចាំនៅកម្ពុជា និង​សភា​ពាណិជ្ជកម្ម​អាមេរិកនៅកម្ពុជានៅសណ្ឋាគាររ៉ូសវូត រាជធានីភ្នំពេញ ពីថ្ងៃទី០៦-០៧ ខែកុម្ភៈ ឆ្នាំ២០២០។ ជាអធិបតីក្នុងពិធីនោះដែរគឺឯកឧត្តម ប៉ាទ្រិក មើហ្វី (W.Patrick Murphy) ឯកអគ្គរដ្ឋទូតអាមេរិកប្រចាំនៅកម្ពុជាមន្ត្រីជាន់ខ្ពស់ក្រសួងពាណិជ្ជកម្ម ក្រសួង ស្ថាប័នពាក់ព័ន្ធ និង​ធុរជនជាតិនិងអន្តរជាតិ ជាច្រើនទៀតផងដែរ។

នៅក្នុងសុន្ទរកថាគន្លឹះ ឯកឧត្តមរដ្ឋមន្ត្រីក្រសួងពាណិជ្ជកម្មបានជម្រាបជូនថា វិស័យកសិកម្ម ជា​វិស័យ​អាទិភាពមួយដែលមានកំណត់នៅក្នុងយុទ្ធសាស្ត្រចតុកោណដំណាក់កាលទី៤របស់​រាជ​រដ្ឋាភិបាល​កម្ពុជា។ ឯកឧត្តមរដ្ឋមន្ត្រីបានជម្រាបជូនពីផលិតផលកសិកម្មមួយចំនួន ដូចជាស្រូវ-អង្ករ ពោត សណ្ដែកសៀង ដំឡូងមី ស្វាយស្វាយចន្ទី កៅស៊ូ បន្លែ ត្រី សាច់ ដែល​សុទ្ធ​សឹង​ជា​ផលិត​ផល​សក្ដានុពលសម្រាប់ជាព័ត៌មានជូនដល់ធុរជនជាតិ និងអន្តរជាតិ ពិចារណា​ក្នុង​ការ​ធ្វើ​អាជីវកម្មឬវិនិយោគនៅកម្ពុជា។ ឯកឧត្តមរដ្ឋមន្ត្រី បាន​សង្កត់​ធ្ងន់​លើ​ការ​លើក​កម្ពស់​ខ្សែ​ចង្វាក់​តម្លៃនិងការកែច្នៃ​ផលិតផល​កសិកម្ម ជាការងារអាទិភាពមួយ ដើម្បី​ទ្រទ្រង់​វិស័យ​កសិកម្ម​ឲ្យ​មាន​ការ​រីក​ចម្រើនមួយចំណែកទៀតដោយក្នុងនោះ ឯកឧត្តមរដ្ឋមន្ត្រី បាន​លើក​ជា​ឧទាហរណ៍​ការ​កែច្នៃ​ដំឡូងមីទៅជាម្សៅគ្រាប់ថ្នាំ ថង់ អេតាណុល និងជាវត្ថុផ្សេងៗទៀត ដែល​សកម្មភាព​ទាំង​នោះនឹងបង្កើតការងារ បង្កើនចំណូល និងធ្វើឲ្យជីវភាពប្រជាពលរដ្ឋមានការរីកចម្រើន។នៅក្នុងន័យនេះ ឯកឧត្តមរដ្ឋមន្ត្រី បានអំពាវនាវឲ្យក្រុមហ៊ុនអាមេរិកក៏ដូចជាក្រុមហ៊ុនក្នុងស្រុក ពិចារណាលើការវិនិយោគបន្ថែមលើការកែច្នៃ​ផលិតផល​កសិកម្មដោយ​បាន​លើក​ឡើង​អំពី​បរិយា​កាស​វិនិយោគល្អប្រសើររបស់កម្ពុជា។

នៅក្នុងសុន្ទករថាបើកឯកឧត្តមឯកអគ្គរដ្ឋទូតអាមេរិក បានជម្រាបជូនថា ការរៀបចំ​វេទិកា​ធុរកិច្ច ស្ដីពី​វិស័យកសិកម្មនៅកម្ពុជានេះជាវេលាដ៏ល្អមួយ គាប់ជួនជាមួយនឹងខួបអនុស្សាវរីយទី៧០ នៃ​ទំនាក់ទំនងការទូតរវាងកម្ពុជានិងសហរដ្ឋអាមេរិក។ ចំពោះវេទិកាធុរកិច្ចលើកនេះ មាន​ក្រុម​ហ៊ុន​ធំៗរបស់អាមេរិកចំនួន១៥ ក្រុមហ៊ុន ដោយក្នុង​នោះរួម​មាន​ក្រុម​ហ៊ុន​ដែល​ប្រកប​កសិកម្ម​បែប​ប្រពៃណីនិងក្រុមហ៊ុនមួយចំនួនទៀតជាក្រុមហ៊ុនដែលមានបច្ចេកវិទ្យាទំនើប ដែល​អាច​ជួយ​ដល់​ការ​ជំរុញវិស័យកសិកម្មនិងបង្កើនទិន្នផល ហើយ​ឯកឧត្តម​សង្ឃឹមថា ក្រុមហ៊ុន​ទាំង​នោះ​នឹង​សហការជាមួយក្រុមហ៊ុនកម្ពុជាដើម្បីធ្វើទំនើបកម្មវិស័យកសិកម្មនៅកម្ពុជា តាមរយៈ​ការ​ប្រើ​ប្រាស់បច្ចេកវិទ្យា។សង្កត់ធ្ងន់លើការប្រើប្រាស់បច្ចេកវិទ្យា ឯកឧត្តមឯកអគ្គរដ្ឋទូត បាន​ជម្រាប​ជូនបន្ថែមទៀតថាតាមរយៈការអភិវ្ឍ​របស់ប្រទេសនីមួយៗ ចំណែក​នៃ​វិស័យ​កសិកម្ម​នឹង​មាន​ការ​ចុះថយជាលំដាប់ហើយក្នុងពេលនោះហើយ ដែល​បច្ចេក​វិទ្យា​នឹង​ជួយ​បំពេញ​បន្ថែម​ក្នុង​ការ​បង្កើនផលិត​ភាពគាំទ្រស្ថិរភាពស្បៀង និង​លើក​កម្ពស់​ខ្សែ​ចង្វាក់​តម្លៃ​កសិកម្ម​សម្រាប់​ការ​នាំ​ចេញ។

សូមជម្រាបជូនថា ចំពោះការធ្វើពាណិជ្ជកម្មទ្វេភាគីកម្ពុជា-សហរដ្ឋអាមេរិកទំហំ​ពាណិជ្ជកម្ម​ក្នុង​ឆ្នាំ​២០១៩ គឺមានសរុបប្រមាណ ៥,៤ ប៊ីលានដុល្លារអាមេរិកគិតត្រឹមខែវិច្ឆិកា ស្មើនឹង​កំណើន​ប្រមាណ ២៧,៤% បើប្រៀបនឹងឆ្នាំ២០១៨។ក្នុងនោះផងដែរ វិស័យ​កសិកម្ម​ក៏រួម​ចំណែក​មួយ​ចំនួន​ដ៏សំខាន់ ក្នុងទំនាក់ទំនងពាណិជ្ជកម្មនៃប្រទេសទាំងពីរ។